FIFA да навбатдаги жанжал: яна Аргентина

Аргентина футболчилари баҳсли Фолкленд (Мальвин) ороллари устидан суверенитет эълон қилинган мазмундаги шиор билан суратга тушгани учун Буюк Британия ҳукумати FIFA масъулларидан текширув ўтказишни сўради.

15 июль куни Атлантада бўлиб ўтган ярим финал баҳсида Аргентина Англияни 2:1 ҳисобида мағлуб этди. Ўйиндан кейин ғалабани нишонлаш чоғи Жанубий Америка жамоаси аъзолари ўриндиқдаги мухлислар узатган “Las Malvinas son Argentinas” – “Мальвин ороллари Аргентинага қарашли” ёзувли баннерни кўтариб туришди.

Энди жамоага майдонда сиёсий ташвиқотни тақиқловчи қоидани бузгани учун FIFA бошқарув идораси томонидан интизомий чора кўрилиши мумкин.

Аргентина Фолкленд ороллари 1833 йил Бирлашган Қироллик томонидан ноқонуний тортиб олинганини иддао қилиб келади.

Илк бор 1765 йил ҳудудий даъво илгари сурган Британия 1833 йил ҳудуд устидан суверенитет ўрнатишга интилаётган Аргентина қўшинини қувиб чиқариш учун оролга ҳарбий кемаларини юборган. Аргентина 1982 йил оролга яна бостириб кириши билан бошланган 10 ҳафталик уруш европаликлар ғалабаси билан якунланган. Можаро давомида Аргентинадан 649, Британиядан 255 аскар, 3 нафар маҳаллий аҳоли вакили ҳалок бўлган.

С.Раҳимов, ЎзА