Олтиариқ узумчилик тажрибасини янада оммалаштириш мақсадида Навоий вилоятининг Кармана туманига Президент совғаси сифатида 6 хил навдаги экспортбоп узум кўчатлари жўнатилди.

Тадбирда Фарғона вилояти ҳокими Хайрулло Бозоров, туман секторлар раҳбарлари, нуронийлар, қишлоқ хўжалиги мутахассислари, деҳқон ва фермерлар иштирок этди.

Олтиариқлик узумчилик кооперацияси раҳбари Исажон Бойматов давлатимиз раҳбари томонидан сўнгги йилларда узумчилик йўналишига катта эътибор қаратилаётганлигини, имтиёзлар берилаётганлигини таъкидлади.

- 10 гектар майдонга қудуқ қазиш учун 120 миллион сўм субсидия ажратиляпти. Бу деҳқон ва фермерларга жуда катта имконият. Ишчи ўрни яратиб, экспорт салоҳиятимиз ортмоқда. Бугун Кармана туманига ҳам 200 гектардан зиёд майдонга экиш учун Ризамат ота, Мерседес, Кетмонсопи, Ҳусайни каби 6 хил навдаги узум кўчатларини юборяпмиз. Ўзимиз ҳам бориб, Олтиариқдаги каби боғларни яратишга ҳиссамизни қўшамиз,-деди Исажон Бойматов.

Шу куни кексалар иштирокида дуолар қилиниб, узум кўчатлари ортилган автомашиналар карвони Навоий вилоятига йўл олди.

Олтиариқ тумани ўзининг узумлари ва узумчилик мактаби билан юртимизда ҳам, хорижда ҳам машҳур. Вилоятдаги 7 минг 834 гектар узум боғларидан 2 минг 250 гектаридан зиёди айнан Олтиариқ туманида жойлашган. Мамлакатимизда узумчиликни ривожлантиришда ушбу туман намуна сифатида олинган.

М. Сулаймонов, 
М. Қодиров (сурат), ЎзА