Бугунги кунда Ўзбекистонда амалга оширилаётган кенг кўламли ислоҳотлар жараёнида оммавий ахборот воситалари жамият ҳаётининг фаол иштирокчиси ҳамда ижтимоий онг ва фикрни шакллантирувчи муҳим кучга айланган. Айниқса, илм-фан, инновация ва тараққиёт йўналишларидаги ютуқ ва ўзгаришларни кенг жамоатчиликка етказишда журналистларнинг фидойилиги ва касбига бўлган садоқати алоҳида эътиборга лойиқ.

Шу тариқа Фанлар академияси фаолиятини мунтазам ва тизимли ёритиб келаётган ОАВ вакиллари ҳам илмий изланишлар, инновацион лойиҳалар ва академик ютуқларни оммага етказиш йўлида фидокорона меҳнат қилаётган малакали ахборот элчиларидир. Уларнинг фаоллиги натижасида фан соҳасидаги долзарб мавзулар кенг жамоатчилик эътиборига ҳавола этилиб, илм-фанга бўлган қизиқиш ва ишонч юксалиб бормоқда.  

Айнан шу фидойилик ва ҳамкорликни эътироф этган ҳолда, Ўзбекистон Фанлар академияси томонидан журналистлар билан очиқ мулоқот шаклида учрашув ташкил этилди.

Ўзбекистон Фанлар академияси президенти Шавкат Аюпов оммавий ахборот воситалари ходимлари куни муносабати билан журналистларни самимият билан қутлади ва илм-фан соҳасида бугунги эришилаётган ютуқлар, долзарб муаммолар ҳамда илмий фаолиятни ёритишда ОАВнинг ўрни алоҳида эканини таъкидлади.  

Шавкат Аюпов шунингдек, Академия томонидан олиб борилаётган илмий изланишлар, инновацион лойиҳалар ва халқаро ҳамкорлик борасидаги янгиликлар ҳақида батафсил тўхталиб ўтди ва илмий жараёнлар ҳақида дунё хабардорлигининг оширилишида ҳам журналистларнинг ҳиссаси бўлаётганини айтиб, уларга миннатдорчилик билдирди.  

“Мана бугун кўриб турибсизлар, барча соҳада кундан-кунга Ўзбекистоннинг обрўси ошиб бормоқда. Шу билан бирга Фан ва илм соҳасида ҳам. Бугун кўплаб атрофдаги ҳамкасбларимиз биз билан ҳамкорлик ўрнатишга қизиқишмоқда. Хусусан, куни кеча ўзининг 1,5 млн обуначисига эга бўлган Американинг “Newsweek” журнали таҳририяти ҳам бизнинг Математикка институтимиз дунёга танилган илмий даргоҳ эканлиги ва бу ҳақида мақола тайёрламоқчиликларини билдиришди. Бу ҳам ўйлаймизки, ФА фаолиятининг ОАВ томонидан доимий ёритиб келинаётганлиги самарасидир.  

Шундай экан, келгусида сизлар билан янада ғайрат ва шижоатла ҳамкорлигимизни қизғин давом эттиришдан манфаатдормиз” дейди, ФА президенти Шавкат Аюпов.  

Ўз навбатида журналистлар ҳам олимлар билан ишлаш билим ва куч талаб қилиши, айниқса, олимнинг саъвиясига тушиш ва уларнинг суҳбатига уйғунлик олиб кириш осон эмаслигини таъкидлашди. Шу билан биргаликда, бугунги кунда ФА олимлари ва уларнинг кашфиётлари ҳақидаги маълумотларни қизиқарли тарзда нафақат ОАВ, балки жамоат жойлари ҳамда аҳоли кўп жойларда тарқатиш, тарғиб қилиш ва шу йўналишдаги лойиҳаларни кўпайтириш лозимлиги ҳақида ўз таклифларини билдириб ўтдилар.  

Мулоқот давомида шунингдек, илмий оммабопликни ошириш, ёшларни илм-фанга жалб этиш ва жамиятда илмий тафаккурни ривожлантириш лозимлиги қайд этилди.  

Самимий мулоқот ниҳоясида Фанлар академияси фаолиятини кенг тарғиб қилишда яқиндан ёрдам бериб келаётган матбуот ва ОАВ ходимлари  Академия томонидан тайёрланган махсус эсдалик совғалари билан тақдирландилар.

<iframe width="650" height="420" src="https://www.youtube.com/embed/1gddZDygJXU" title="Fanlar akademiyasi prezidenti OAV vakillari bilan uchrashdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

М.Эшмирзаева, Д.Якубов (видео), ЎзА