Бу ҳақда Президент Шавкат Мирзиёев раислигида сунъий интеллект технологияларини ривожлантириш юзасидан бўлиб ўтаётган видеоселектор йиғилишида таъкидланди.

Сўнгги йилларда барча вазирлик ва идораларда иш жараёнлари ва маълумотларни рақамлаштириш бўйича анча иш қилинди.  

Рақамли ҳукумат платформаси орқали давлат органлари ўртасида инсон омилисиз маълумотларнинг алмашинуви йўлга қўйилди.  

Стартапларга ўзининг дастурий маҳсулотини Рақамли ҳукумат платформасига интеграция қилиб, ундаги маълумотлардан фойдаланишга рухсат берилди.  

Лекин сунъий интеллектни жадал ривожлантириш учун буларнинг ўзи етарли эмаслиги кўрсатиб ўтилди.  

Вазирлик ва идоралардаги маълумотлар ҳар хил серверларда тарқоқ сақланаётгани, уларнинг форматлари турлича бўлгани учун ҳам ишлар суст кетяпти.  

Шу боис, йил якунига қадар вазирлик ва идоралардаги 55 та, келаси йил қолган барча маълумотлар базаларини Электрон ҳукумат ягона дата-марказига ўтказиш топширилди. Бундан буён вазирлик ва идоралар маълумотларни ўз серверларида сақлашига йўл қўйилмайди.

Президент Шавкат Мирзиёев раислигида сунъий интеллект технологияларини ривожлантириш юзасидан видеоселектор йиғилиши бўлиб ўтмоқда.

ЎзА