Энди "Алпомиш" кўчаси оддийгина ҳаракатланиш ҳудуди бўлиб қолмайди
Бугун шаҳарлар тараққиёти фақат янги бинолар ва кенг йўллар билан эмас, балки инсон учун яратилаётган қулайлик, хавфсизлик, замонавий хизматлар ва яшаш муҳитининг сифати билан ҳам ўлчанмоқда. Шу маънода, Бухоро шаҳрида амалга оширилаётган янги ташаббуслар қадимий шаҳарнинг тарихий қиёфасини асраб, уни замонавий урбанистик ечимлар билан уйғунлаштиришга қаратилгани билан алоҳида аҳамият касб этади.
Давлат раҳбари томонидан ҳудудларда замонавий шаҳар муҳитини шакллантириш, хизмат кўрсатиш соҳасини ривожлантириш, тадбиркорлик учун янги имкониятлар яратиш, аҳоли ва сайёҳлар учун қулай жамоат маконларини кўпайтиришга қаратилаётган эътибор Бухорода ҳам ўзининг амалий ифодасини топмоқда. Ана шундай йирик лойиҳалардан бири — Бухоро шаҳрининг “Б. Нақшбанд” маҳалласидаги “Алпомиш” кўчасининг 900 метрлик қисмини 24/7 режимида фаолият юритадиган замонавий хизмат кўрсатиш кўчасига айлантириш лойиҳасидир. Мазкур лойиҳа оддий ободонлаштириш ишлари билан чекланмайди. Унинг замирида кўчани туну кун яшайдиган, одамлар вақтини мазмунли ўтказадиган, тадбиркорлар фаолият юритадиган ва меҳмонларда яхши таассурот қолдирадиган замонавий жамоат маконига айлантириш ғояси мужассам. Шунингдек, лойиҳага асосан, замонавий ёритиш тизими ўрнатилиб, қуёш панеллари асосида ишлайдиган автоном чироқлар жойлаштирилади. Пиёдалар учун қулай ва хавфсиз йўлаклар барпо этилади. Айниқса, 5 минг 700 квадрат метр майдонда “яшил ҳудуд” ташкил этилиши кўчанинг экологик ва эстетик қиёфасини тубдан ўзгартиради. Манзаравий ва шакл ҳосил қилувчи дарахтлар экилиб, кўча бўйлаб яшил макон барпо этилади. Бундан ташқари, ҳудудда фаввора, замонавий стеллалар, декоратив элементлар, ўриндиқлар ва чиқинди қутилари ўрнатилади. Спортсеварлар учун 2 та воркаут майдончаси ташкил этилиши эса мазкур масканни нафақат сайр қилиш, балки фаол дам олиш учун ҳам қулай манзилга айлантиради. Сув оқизиш лотокларининг барпо этилиши эса ҳудуд инфратузилмасининг функционал жиҳатдан пухта ўйланганидан далолат беради.
Лойиҳанинг энг муҳим жиҳати — унинг 24/7 режимида фаолият юритиши. Яъни “Алпомиш” кўчаси кун давомида хизмат кўрсатиш, савдо ва тадбиркорлик маскани бўлса, кечки ва тунги пайтларда ҳам ўз ҳаётини давом эттирадиган замонавий жамоат ҳудудига айланади. Атрофни тежамли ва ёрқин ёритиш, ободонлаштирилган пиёдалар йўлаклари, яшил ҳудудлар, фаввора ва декоратив элементлар кўчага ўзига хос муҳит бағишлайди. Бу айниқса сайёҳлар учун муҳим. Бухорога келган меҳмон шаҳарнинг тарихий обидалари билангина эмас, унинг замонавий ҳаёти, тунги муҳити ва аҳолининг кундалик турмуш тарзи билан ҳам танишиш имкониятига эга бўлади. Шу жиҳатдан қараганда, лойиҳа Бухоронинг тарих ва замонавийлик уйғунлашган шаҳар сифатидаги жозибасини янада кучайтиради. 12,9 миллиард сўмлик инвестиция — янги иқтисодий фаоллик
Лойиҳанинг умумий қиймати 12,9 миллиард сўмни ташкил этади. Шундан 10,2 миллиард сўми ташаббускорлар маблағлари, 2,7 миллиард сўми эса республика маблағлари ҳисобидан йўналтирилади. Энг эътиборлиси, мазкур лойиҳа янги шаҳар маконини яратиш билан бирга, иқтисодий фаоллик учун ҳам мустаҳкам замин яратади. Унинг доирасида 30 та тадбиркорлик субъекти фаолиятини кенгайтириши ва 100 та янги иш ўрни яратилиши кўзда тутилган. Натижада қўшимча 1,2 миллиард сўм солиқ тушуми таъминланиши кутилмоқда. Демак, бу кўча шунчаки обод ҳудуд эмас. У янги иш ўринлари, янги хизматлар, янги тадбиркорлик ташаббуслари ва янги даромад манбаларини юзага келтирадиган иқтисодий маконга ҳам айланади.
Бугунги Бухорода қадимий тарих нафаси билан замонавий шаҳар ритми тобора уйғунлашиб бормоқда. Бир томонда минг йиллик тарихни ўзида мужассам этган обидалар, иккинчи томонда замонавий хизмат кўрсатиш масканлари, яшил ҳудудлар ва янги жамоат маконлари — буларнинг барчаси шаҳар тараққиётининг янги қиёфасини намоён этмоқда. “Алпомиш” кўчасининг 24/7 форматида ташкил этилиши ҳам ана шу жараённинг навбатдаги муҳим босқичидир.
Бу лойиҳа амалга ошгач, кўча оддийгина ҳаракатланиш ҳудуди бўлиб қолмайди. У одамлар учрашадиган, оилалар ҳордиқ чиқарадиган, ёшлар спорт билан шуғулланадиган, тадбиркорлар фаолият юритадиган, сайёҳлар Бухоронинг замонавий ҳаётини ҳис қиладиган масканга айланади. Энг муҳими, бундай лойиҳалар шаҳарни фақат чиройли қилишга эмас, инсон учун қулай, хавфсиз, замонавий ва сермазмун муҳит яратишга хизмат қилади.
“Алпомиш” кўчасида бунёд этилаётган янги макон Бухоронинг кечаси ҳам уйғоқ, хизматлари ҳамиша очиқ, сайёҳлар учун жозибадор ва тадбиркорлар учун имкониятларга бой замонавий шаҳар бўлиш йўлидаги яна бир амалий қадамдир.
Бугун бир кўча ўзгаради. Эртага эса бу ўзгариш бутун шаҳарнинг кайфияти ва қиёфасига таъсир қилади. Зеро, замонавий шаҳар катта бинолардан эмас, аввало инсон учун яратилган қулай ва мазмунли маконлардан бошланади.
Зариф Комилов, ЎзА мухбири
