Хитойнинг Dongguan Nuoxing Electronics Co., Ltd. компанияси мутахассислари литий аккумулятор батареяларини  Wi-Fi ва 5G мобиль таянч алоқа станцияларидан заряд қилиш имконини берувчи технология ишлаб чиқди. Компания бош директори Фенг Сингюань бу ҳақида сўзлаб берди.

– Жаноб Фенг Сингюань, компаниянгиз ва  яратилган маҳсулот ҳақида сўзлаб берсангиз. 

– Компаниямиз 2006 йилда ташкил этилган бўлиб, ҳозирги кунда  Хитойда кенг танилган. 18 йиллик фаолият давомида барча турдаги батареяларни ишлаб чиқаришни ўзлаштирдик. Компаниямизнинг 6 та заводида барча турдаги ва ўлчамдаги литий, литий-марганец ва ишқорий батареялар  ишлаб чиқарилади. 

 – Литий батареялари анчадан буён қўлланилади ва кўпчилик  уларни такомиллаштириб бўлмайди, деб ўйлайди. 

– Бизда ишлаб чиқариладиган литий батареяларини қувватлантириш учун қўшимча мослама харид қилиш талаб этилмайди. Usb-кабели бевосита  батареяга уланади,  фойдаланувчига қулай бўлиши учун қувватлантириш жараёни бошланганини кўрсатувчи яшил индикатор ёнади. Бунинг натижасида,  батареяни телефонингизнинг қувват манбаи орқали тўғридан-тўғри электр тармоғидан қувватлантириш мумкин. Батареяни қувватлантириш учун электр энергия манбаининг ҳар қандай тури, жумладан повербанкдан ҳам фойдаланиш мумкин. Бундай батареялар оксидланмайди ҳам, портламайди ҳам. Буни кўрсатиб бериш учун уни сувга ташлаб, кейин чиқариб беришим мумкин, у ишлашда давом этади. Айни пайтда у атиги етти юань туради. Бу ҳозирги валюта бўйича 90 АҚШ центи деганидир. 

– Ўзбекистон компаниялари маҳсулотингизга қизиқиш билдирдими?

– Ўндан зиёд маҳаллий компаниялар биз билан боғланишди. Биз улар билан музокара ўтказиб, барча масалаларни келишиб оламиз. Ҳозирги кунда биз Ўзбекистонда дилер қидираяпмиз. 

– Сизнингча, келажакда қандай батареялар кўпроқ ишлаб чиқарилади?

– Албатта, литий батареямлар. Улар енгил ва кам портловчи ҳисобланади. Масалан, бизда Wi-Fi ва 5G мобиль таянч алоқа станцияларидан заряд қилинадиган батарея намуналаримиз бор. Ягона талаб, бунинг учун сигнал кучли бўлиши керак. Уч йил олдин биз Хитойда ушбу технологияни лицензиялаш ва рўйхатдан ўтказиш учун ариза топширганмиз ва тез орада  тегишли ҳужжатларни оламиз. 2025 йилнинг 25 апрель куни якуний тақдимот ўтказилади, унда мазкур технологияни намойиш этиш режалаштирилган.  Келгуси йили биз ишланмамизни Ўзбекистонга тақдим этамиз. 

- Бизга ажратган вақтингиз учун жаноб Фенг Сингюань,  сизга миннатдорчилик билдирамиз, Ўзбекистонда янги батареяларингиз тақдимотида сиз билан қайта учрашамиз деган умиддаман. 

ЎзА мухбири Роман Бондарчук суҳбатлашди.