Кашф этилган янги турнинг номи юртимиз шарафига бағишланиб – Elymus uzbekistanicus деб номланди.

Ўзбекистон, Қирғизистон ва Хитойлик ботаник олимлар ҳамкорлигида олиб борилган илмий изланишлар натижасида бошоқдошлар (Poaceae) оиласига мансуб сулибош (Elymus) туркумига кирувчи ва илгари фан учун номаълум бўлган мутлақо янги ўсимлик тури кашф этилди. 

Мазкур янги турнинг номи юртимиз шарафига бағишланиб — Elymus uzbekistanicus деб номланди. Бу юзасидан ФА Ахборот хизмати маълум қилмоқда. 

Ушбу муҳим илмий ютуқ хлоропласт ва ядровий ДНК кетма-кетликлар таҳлиллари, шунингдек, анъанавий морфологик тадқиқот методлари асосида амалга оширилган. 

Турнинг илмий тавсифи, идентификация калити, юқори сифатли тасвирлари, географик тарқалиши ва экологик хусусиятлари кенг қамровли тарзда ёритилиб, халқаро ботаника ҳамжамиятига тақдим этилган. 

 Elymus uzbekistanicus бу сўнгги 57 йил ичида Poaceae оиласидан Ўзбекистон ҳудудида аниқланган илк янги тур ҳисобланади.  

Бу янгилик мамлакатимиздаги биологик хилма-хилликнинг ҳали тўлиқ ўрганилмаган улкан салоҳиятлари мавжудлигини яна бир бор тасдиқлайди.

Янги тур Ўзбекистон Миллий гербарийси (ТАШ) коллекциясида сақланаётган намуна асосида аниқланган бўлиб, бу гербарий фондининг мамлакатда олиб борилаётган илмий тадқиқотларда тутган ўрни ва аҳамиятини янада оширди. 

Миллий гербарий нафақат ботаникалар учун муҳим манба, балки Ўзбекистоннинг табиий бойликлари ва биологик меросининг тарихий гувоҳи ҳамдир.

Кашфиётга бағишланган илмий мақола дунёнинг нуфузли ботаника журналларидан бири ҳисобланган PhytoKeys нашрида чоп этилди.

М.Эшмирзаева, ЎзА