Экстремизм учун жазони кучайтириш эмас, жавобгарликни либераллаштириш таклиф этилмоқда
Олий Мажлис Қонунчилик палатасининг навбатдаги мажлиси ўз ишини бошлади. Унда бир қатор қонун лойиҳалари кўриб чиқилмоқда.
Дастлаб “Ўзбекистон Республикасининг айрим қонун ҳужжатларига экстремизмга қарши курашиш самарадорлигини оширишга қаратилган ўзгартириш ва қўшимчалар киритиш тўғрисида”ги қонун лойиҳаси иккинчи ўқишда кўриб чиқилди.
— Бугунги кунда экстремистик ва террорчилик ташкилотлари ахборот технологиялари ҳамда интернет тармоқларидан фойдаланиб, айниқса, ёшларни зўравонликка жалб этишга уринаётгани кузатилмоқда, — деди депутат Анвархон Темиров. — Шу боис, амалдаги қонунчиликни такомиллаштириш, профилактика чора-тадбирларини кучайтириш, масъул идоралар ўртасидаги ҳамкорликни янада мустаҳкамлаш зарурати юзага келмоқда. Шу мақсадда қонун лойиҳаси билан Ўзбекистон Республикасининг Жиноят кодекси ҳамда Маъмурий жавобгарлик тўғрисидаги кодексига жамоат хавфсизлиги ва тартибига таҳдид солувчи материалларни тайёрлаш, сақлаш, тарқатиш ёки намойиш этиш билан боғлиқ ҳуқуқбузарликлар учун жавобгарлик чораларини такомиллаштириш назарда тутилмоқда.
Шунингдек, экстремизмнинг олдини олиш, бу ҳақда хабар берган шахсларни рағбатлантириш ва ҳимоя қилиш, экстремистик ташкилотларни белгилаш тартиблари белгиланмоқда.
Айрим жамоатчилик вакиллари томонидан “экстремизм учун жавобгарлик кучайтириляпти”, деган мазмунда муҳокамалар бўлди. Аксинча, лойиҳада экстремизм учун бирданига жазони кучайтириш эмас, балки жавобгарликни аниқлаштириш ва либераллаштириш таклиф этилмоқда. Яъни, агар инсон биринчи марта бундай хатога йўл қўйса, унга нисбатан бирдан жиноят иши очмасдан маъмурий жавобгарлик (жарима ёки маъмурий қамоқ) белгилаш назарда тутилмоқда.
Қонун лойиҳаси экстремизмга қарши курашиш, жамиятда тинчлик-осойишталикни таъминлашда муҳим аҳамият касб этади.
Моддама-модда муҳокамалардан сўнг қонун лойиҳаси иккинчи ўқишда қабул қилиниб, Сенатга юборилди.
Муҳтарама Комилова,
ЎзА
