Дзюдо: “Тошкент” жамоаси муваффақиятга эришди
Тошкентдаги “Олимпия шаҳарчаси” спорт мажмуасида Халқаро дзюдо федерацияси тақвимидан ўрин олган "Шаҳарлар жанги" континентал дивизион халқаро саралаш турнирининг тўртинчи босқич мусобақалари бўлиб ўтди.
Айтиш лозимки, ўн саккиз ёшгача бўлган дзюдочилардан иборат жамоалар ўртасида ташкил этилаётган ушбу мусобақага саккизта шаҳар мезбонлик қилиши белгиланган бўлиб, унинг тўртинчи босқичига мамлакатимиз мезбонлик қилди.
Турнир дастурига кўра, Олий дивизионнинг саккизта минтақаси ғолиблари ва кумуш медаль соҳиблари суперфиналга тўғридан-тўғри йўлланма олади. Учинчи ва тўртинчи ўринни эгаллаган жамоалар финалга чиқиш учун халқаро саралаш турнирида иштирок этади.
"Шаҳарлар жанги" халқаро серияси мусобақалари шу йилнинг 23 сентябрь куни Қозоғистоннинг Остона шаҳрида бошланган эди. Кейин Беларуснинг Минск, Қирғиз Республикасининг Бишкек шаҳарларида навбатдаги босқич баҳслари ташкил этилди.
Пойтахтимиз мезбонлик қилган тўртинчи босқичда "Тошкент", "Хоразм" ҳамда Россиянинг "Троитск" ва "Тюмен" жамоалари ўзаро беллашди.
Муросасиз кечган баҳслар натижасида "Тошкент" жамоаси "Хоразм" дзюдочиларини 13:8, "Тюмен"ни 13:4, "Троитск"ни 13:4 ҳисобида енгиб, тўртинчи минтақа ғолиби сифатида суперфинал йўлланмасига эга чиқди.
Умумий мукофот жамғармаси 5 миллион АҚШ долларидан иборат "Шаҳарлар жанги" Гран-при мусобақасининг финали 2027 йилнинг 15-24 январь кунлари Бирлашган Араб Амирликларида ўтказилади.
Т.Рўзиев,
ЎзА
