Тошкент вилояти Чиноз тумани ҳокимининг биринчи ўринбосари Оққўрғон туманида жойлашган фермер хўжаликнинг 35 гектар суғориладиган ер майдонини ҳокимият тизимида ишловчи танишлари орқали боғдорчилик билан шуғулланмоқчи бўлган фуқаро номига расмийлаштириб бериш эвазига 90 минг АҚШ доллари талаб қилади.

Давлат хавфсизлик хизматининг Тошкент вилояти бўйича бошқармаси ходимларининг Иқтисодий жиноятларга қарши курашиш департаменти ҳамда вилоят прокуратураси билан ҳамкорликда ўтказган тезкор тадбирида, у сўралган пулдан 40 минг АҚШ долларини аванс сифатида олган вақтида ушланди.

Шунингдек, унинг ноқонуний хатти-ҳаракатида воситачилик қилган 1982 й.т. фуқаро ҳам қўлга олинди.

Сирдарё вилоятининг Гулистон шаҳрида яшовчи, муқаддам судланган фуқаро Мирзаобод туманидаги фермер хўжаликларидан бирига боғдорчилик ва қишлоқ хўжалиги маҳсулотларини етиштириш мақсадида ажратилган 32 гектар ер майдонини танишлари орқали харидор номига расмийлаштириб бериш эвазига 35 минг АҚШ доллари олган вақтида ушланди.

<iframe width="650" height="420" src="https://www.youtube.com/embed/4Ik_jyiV9hI" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Фарғона вилоятида кузатилган ҳолатда эса Олтиариқ туманида яшовчи, муқаддам судланган шахс Фарғона туманидаги боғдорчиликка ихтисослашган МЧЖга қарашли 2 гектар ер майдонини туман кадастр бўлимидаги танишлари орқали харидор номига расмийлаштириб бериш эвазига 18 минг АҚШ доллари талаб қилади. У сўралган пулдан 10 минг АҚШ долларини ўзининг жиноий шериги орқали олган вақтида ушланди.

ДХХ ходимлари томонидан Тошкент шаҳрида ўтказилган тезкор тадбирда эса Тошкент вилояти Юқоричирчиқ туманидаги боғдорчиликка ихтисослашган фермер хўжаликнинг ишчиси ушбу хўжаликнинг 30 сотих ер майдонини тегишли ҳужжатларини расмийлаштириб, харидор номига ўтказиб бериш эвазига 7 минг АҚШ доллари олган вақтида ушланди.

Ҳозирда мазкур ҳолатлар юзасидан Жиноят Кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.