Маълумки, “Экологик экспертиза тўғрисида”ги қонунга мувофиқ, республика ҳудудида режалаштирилаётган ёки амалга оширилаётган хўжалик ва бошқа хил фаолиятнинг экологик талабларга мувофиқлигини белгилаш ҳамда объектини рўёбга чиқариш мумкинлигини аниқлаш мажбурий ҳисобланади.

Тегишли ташкилотларда давлат экологик экспертизасини ўтказишни ташкил этиш мақсадида Экология, атроф-муҳитни муҳофаза қилиш ва иқлим ўзгариши вазирлиги ҳузурида “Давлат экологик экспертизаси маркази” давлат муассасаси фаолияти йўлга қўйилган.  

Хўш, Давлат экологик экспертизаси марказининг вазифалари нималардан иборат?  

Давлат экологик экспертизаси маркази ахборот хизмати раҳбари Шаҳзода Акрамованинг маълум қилишича, Давлат экологик экспертизаси — мўлжалланаётган ёки амалга оширилаётган хўжалик ва бошқа фаолиятнинг экологик талабларга мувофиқлигини ва экологик экспертиза объектини реализация қилиш мумкинлиги ёки мумкин эмаслигини аниқлаш мақсадида ихтисослаштирилган эксперт бўлинмалари томонидан ўтказиладиган экологик экспертиза тури ҳисобланади.  

Қайд этилишича, жорий йил давомида атроф-муҳитга таъсирни баҳолаш материалларини давлат экологик экспертизасидан ўтказиш марказининг (www.eco-service.uz) веб-сайти орқали электрон ҳужжат алмашинуви тизими ишга туширилган. Республика ҳудудида атроф-муҳитга таъсир кўрсатиш бўйича I дан IV тоифага мансуб жами 20 мингдан ортиқ объект бўйича экологик экспертиза хулосалари берилган.  

Экологик баҳолаш материаллари бўйича 400 дан ортиқ жамоатчилик эшитувлари ўтказилган ҳамда 14 та объект Экспертлар кенгаши томонидан кўриб чиқилиб, хулосалар бекор қилинган.  

Мутахассиснинг сўзларига кўра, мамлакатимизга хорижий инвестицияларни жалб қилиш мақсадида ишлаб чиқарувчи корхоналар томонидан атроф-муҳитни муҳофаза қилиш соҳасидаги қонунлар ижросини таъминлаш мақсадида экологик аудити ўтказилиши белгиланган бўлиб, мазкур ишларни тартибга солувчи экологик аудиторларни тайёрлаш регламенти ҳам тасдиқлаб қўйилган.  

Маълумот ўрнида таъкидлаш лозимки, Давлат экологик экспертизаси амалга ошириладиган фаолият турлари рўйхати қайта кўриб чиқилган. Тегишли рўйхатга кўра, 143 та фаолият тури давлат экологик экспертизасидан ўтказилади.  

Муҳайё Тошқораева, ЎзА