Бухорода “Ҳоким соврини учун” фан олимпиадаси барча шаҳар ва туманларида кўтаринки руҳда байрамона тарзда ташкил этилди. Математика фанидан ўтган олимпиадада жами 1744 нафар 8-10-синф ўқувчилари жалб этилди.

Белгиланган талаблар асосида ўтказилган тест натижаларига кўра, иштирокчилар орасидан жами 121 нафар ғолиблар аниқланиб, маҳаллий ҳокимликлар томонидан муносиб рағбатлантирилади. 

– “Долзарб 90 кун” лойиҳаси доирасида Бухоро вилояти мактабгача ва мактаб таълими бошқармаси томонидан иқтидорли ўқувчи-ёшларни қўллаб-қувватлаш, маҳаллий ва халқаро фан олимпиадаларига тайёрлаш мақсадида ушбу фан олимпиадаси ташкил этилди, – дейди Бухоро вилояти мактабгача ва мактаб таълими бошқармаси бошлиғи Ҳамза Эллиев. – Мазкур олимпиада бир босқичда (туман, шаҳар босқичи шаклида) 8-10-синф ўқувчилари орасида 12 та фан йўналиши бўйича 14 августга қадар ҳафтанинг ҳар пайшанба куни ўтказиб борилади.

Зариф Комилов, ЎзА мухбири