Будапешт Украинага ҳарбий ёрдам кўрсатишни режалаштирмаяпти
Венгрия Украина ҳудудига ўз ҳарбий хизматчиларини ҳамда қурол-яроғ етказиб беришни режалаштирмаяпти. Бу ҳақда мамлакат Ташқи ишлар вазирлиги вакили Дёрдь Велкей “Bloomberg” нашрига берган интервьюсида маълум қилди.
Дипломатнинг сўзларига кўра, Будапештнинг асосий манфаати ва устувор вазифаси Венгриянинг ўз ҳудудида тинчлик ва хавфсизликни мустаҳкам таъминлашдан иборат.
Ўлка бош вазири Петер Мадьяр бошчилигидаги янги маъмурият Европа Иттифоқининг умумий сиёсий йўналишлари билан яқиндан ҳамкорлик қилишга интилаётган бўлса-да, Украинага кўрсатиладиган ёрдам фақатгина инсонпарварлик кўмаги ва энергетика ресурсларини етказиб бериш билан чекланади.
Бундан ташқари, Венгрия ва Россия ўртасидаги дипломатик муносабатларда ҳам кескинлик кузатилмоқда. Яқинда Венгриянинг РФдаги муваққат ишлар вакили Габор Гергич Россия ТИВга чақирилиб, унга кескин норозилик билдирилди. Бунга Будапешт томонидан 8 сентябрь куни бир гуруҳ россиялик дипломатларнинг мамлакатдан чиқариб юборилиши сабаб бўлган.
Россия президенти матбуот котиби Дмитрий Песков ушбу дипломатик келишмовчилик икки мамлакат ўртасидаги иқтисодий алоқаларга салбий таъсир кўрсатиши мумкинлигини истисно этмади.
Ф.Яхшибоева, ЎзА
