Буюк Британия парламентининг 200 дан ортиқ аъзоси мамлакат Бош вазири Кир Стармерга Фаластин давлатини тан олиш учун чоралар кўришга чақирди.
Пайшанба куни Франция президенти Эммануэль Макрон сентябрь ойида бўлиб ўтадиган БМТ Бош Ассамблеяси йиғилишида Фаластин давлатини расман тан олишини маълум қилди.
- Бирлашган Қироллик томонидан Фаластиннинг давлат сифатида тан олиниши муҳим тарихий аҳамиятга эга, шунинг учун биз сизни бу қадамни тезроқ қўйишга чақирамиз, — дейилади депутатларнинг бош вазир Кир Стармер ва ташқи ишлар вазири Девид Леммига йўллаган мактубида.
Мурожаат матни жума куни Лейбористлар партияси депутати Сара Чемпионнинг “Х” ижтимоий саҳифасида эълон қилинди.
Хатни 221 депутат имзолаган.
Аввалроқ, ўлканинг 50 дан ортиқ собиқ дипломатлари ва БМТ ходимлари Стармерни Фаластин давлатлигини тан олишга ва Ғазо секторидаги вазият юзасидан Исроилга қарши қўшимча чоралар кўришга чақирган мактубни имзолаган эди.
Ҳозиргача Фаластин давлатини 147 давлат тан олган, АҚШ улар орасида эмас. 2024 йилда Қўшма Штатлар Фаластиннинг БМТга тўлиқ аъзолигига вето қўйди. Ўтган йилдан бери Фаластинни ўнта давлат, жумладан, Ирландия, Норвегия, Испания ва Арманистон тан олди.
С.Раҳимов, ЎзА