Олий Мажлис Қонунчилик палатасининг мажлисида “Фуқароларнинг давлат пенсия таъминоти тўғрисида”ги Ўзбекистон Республикаси Қонунига ҳамда Ўзбекистон Республикасининг Меҳнат кодексига ўзгартиш ва қўшимчалар киритиш ҳақида”ги қонун лойиҳаси биринчи ўқишда муҳокама қилинди.

Мазкур қонун лойиҳаси билан боқувчисини йўқотганлик пенсияси тўловларини марҳумнинг қарамоғидаги фарзандларига, улар 18 ёшгача, агар умумий ўрта таълим муассасаси, академик лицей ва олий таълим муассасасида ўқиётган бўлса 23 ёшга тўлгунга қадар боқувчисини йўқотганлик пенсиясини тўлаш назарда тутилмоқда. 

Шунингдек, ногиронлиги болаликдан бўлган болаларга 18 ёшгача қараган даврини иш стажига қўшиб ҳисоблаш, болани парваришлаш вақтининг ҳаммасини жамланганда кўпи билан 6 йиллик даврни иш стажига қўшиб ҳисоблаш белгиланмоқда.  

— Ушбу қонун лойиҳаси жуда халқчил ҳужжат ҳисобланади, — деди Қонунчилик палатаси депутати Урал Ўрозбоев. — Жойларда бўлганимизда, сайловчилар билан учрашганимизда аҳоли вакиллари, аёллар томонидан мазкур қонун лойиҳасида кўзда тутилаётган масала ва муносабатларга оид жуда кўплаб саволлар берилар эди. Статистик маълумотларга кўра, юртимизда 70 фоиз аёлларда 2 ва ундан ортиқ болалари бор. Амалдаги қонунчиликка кўра, нечта фарзанд бўлишидан қатъий назар меҳнат стажига 3 йил стаж қўшилар эди. Қонун лойиҳасида эса болани парваришлаш вақтининг ҳаммасини жамланганда кўпи билан 6 йил стаж қўшиш таклиф этилмоқда.  Бу эса аёлларимизни қўллаб-қувватлашга хизмат қилади.

Мажлисда қайд этилганидек, қонун лойиҳаси билан республика ҳудудида карантинли ва инсон учун хавфли бўлган бошқа юқумли касалликлар тарқалиши таҳдиди мавжуд бўлган даврда пенсия олиш ҳуқуқи вужудга келган фуқаролар ушбу тадбирлар (чекловлар) даврида ёки тугагандан сўнг бир ой ичида пенсия тайинлашни сўраб мурожаат этган тақдирда, уларга пенсия уни олиш ҳуқуқи пайдо бўлган санадан тайинлаш таклиф этилмоқда.

Мажлисда қонун лойиҳаси биринчи ўқишда қабул қилинди. 
 

Муҳтарама Комилова, ЎзА