Бола ҳуқуқлари – инсон ҳуқуқларининг ажралмас қисми
1 июнь – Халқаро болаларни ҳимоя қилиш куни муносабати билан болалар ҳуқуқлари, уларни ҳар томонлама қўллаб-қувватлаш ва мамлакатимизда бу борада амалга оширилаётган ишлар хусусида Миллатлараро муносабатлар қўмитасининг Стратегик режалаштириш ва ахборот-таҳлил бўлими мутахассиси, 3-даражали юрист Мирсултон Мирзараҳматов қуйидагиларни гапириб берди:
— Халқаро болаларни ҳимоя қилиш куни, аввало, ҳар бир боланинг ҳуқуқлари, манфаатлари ва фаровон ҳаётини таъминлаш масалаларига жамият эътиборини қаратиш кунидир. Бола ҳуқуқлари инсон ҳуқуқларининг ажралмас қисми ҳисобланади. Шунинг учун ҳам бугунги кунда дунё давлатлари болаларнинг таълим олиши, соғлом ўсиши ва хавфсиз муҳитда вояга етишига алоҳида аҳамият бермоқда.
Мамлакатимиз БМТнинг “Бола ҳуқуқлари тўғрисида”ги Конвенциясига қўшилган давлат сифатида халқаро мажбуриятларни изчил бажариб келмоқда. Конституциямизда ҳам оила, оналик, оталик ва болалик давлат ҳимоясида экани мустаҳкамланган. Сўнгги йилларда мактабгача таълим қамровини ошириш, янги мактаблар қуриш, инклюзив таълимни ривожлантириш, болалар саломатлигини муҳофаза қилиш бўйича муҳим ишлар амалга оширилди. Буларнинг барчаси ёш авлоднинг муносиб таълим ва тарбия олиши учун хизмат қилмоқда.
Ота-она, таълим муассасалари, жамоат ташкилотлари ва ҳар бир фуқаро болалар тақдирига дахлдор. Масалан, эҳтиёжманд оилалар фарзандларига ёрдам бериш, хайрия тадбирларида қатнашиш ёки болалар таълимига кўмаклашиш ҳам жамиятнинг ижтимоий масъулиятини намоён этади.
Мисол учун, “Бор меҳримиз сенга, болажон!” донорлик акцияси ҳақида гапирадиган бўлсак, бу акциянинг аҳамияти жуда катта. Чунки айрим оғир хасталикларга чалинган болаларни даволашда қон ва унинг таркибий қисмларига эҳтиёж юқори бўлади. Бир инсоннинг донорлик қилиши бир неча бемор боланинг ҳаётини сақлаб қолиши мумкин. Шу маънода мазкур акция нафақат тиббий ёрдам, балки инсонпарварлик ва ҳамжиҳатликнинг амалий кўринишидир.
Халқаро тажриба шуни кўрсатадики, болалар таълими ва саломатлигига сарфланган маблағ энг самарали инвестиция ҳисобланади. Чунки бугун мактабда ўқиётган болалар эртага мамлакат иқтисодиётини, илм-фанини ва давлат бошқарувини ривожлантирадиган кадрлар бўлади. Шунинг учун болаларга яратилаётган ҳар бир имконият келажакка қўйилган мустаҳкам пойдевордир.
Нигора Раҳмонова,
ЎзА
