Эътироф
Импорт ўрнини босувчи маҳсулотлар ишлаб чиқариб, янги иш ўринлари яратаётган ва аҳоли фаровонлигини юксалтириш йўлида астойдил меҳнат қилаётган тадбиркорлар доимо эътиборда.
Шу маънода Ўзбекистон Республикаси Президентининг жорий йил 18 август куни "Тадбиркорлар куни муносабати билан соҳа вакилларидан бир гуруҳини мукофотлаш тўғрисида"ги фармони эълон қилинди. Эътироф этилганлар қаторида “BMB Holding” компанияси Кузатув кенгаши раиси Бекзод Маматқулов бўлиб, у “Дўстлик” ордени билан мукофотланди.
Компания асосчисини мукофот билан қутлаган ҳолда мамлакатимизда тадбиркорликни қўллаб-қувватлаш ва ривожлантириш борасида яратилган имкониятлар хусусидаги мулоҳазаларини тингладик.
– Аввало, “Дўстлик” ордени қутлуғ бўлсин!
– Ташаккур! Аслида қилган меҳнатларимизни ўзимиз арзимас, деб билсакда, буни юксак баҳолаб, эътироф этгани учун Президентимизга миннатдорлик билдираман. Менга берилган баҳони нафақат ўзимнинг, балки компаниямиз тизимида фаолият юритаётган минглаб ходимларнинг эътироф этилиши, деб биламан.
– Компаниянгизнинг ташкил этилиши ҳақида тўхталиб ўтсангиз?..
– “BMB Holding” компаниясининг ташкил қилиниши мамлакатимиз Янги Ўзбекистон, деб номланишининг дастлабки кунлари билан тенг ҳисобланади. Муҳтарам Президентимиз томонидан олиб борилаётган кенг ислоҳотларга ишониб, таъсисчиларимиз билан тадбиркорларга берилган имкониятлардан оқилона фойдаланиш мақсадида мазкур компанияни ташкил қилдик.
– Бугун компаниянинг халқаро майдондаги ўрни қай даражада, нечта мамлакат билан ҳамкорлик йўлга қўйилган?
– Бугунги кунда тизимимиз асосан хорижнинг мингдан ортиқ компаниясига мамлакатимизда бемалол фаолият олиб бориш учун консалтинг ва ҳуқуқий кўмак бериб келмоқда. Италиянинг Милан шаҳрида бевосита “Oro Rosso” брендида қўшма корхона очганмиз. Мазкур қўшма корхона Ўзбекистонда етиштирилган заъфаронни Милан шаҳрида чуқур қайта ишлаб, йигирма турдан ортиқ маҳсулотлар ишлаб чиқариб, АҚШ ва жаҳоннинг бошқа мамлакатларига экспорт қиляпти.
– Бизнесда рақобатчининг бўлиши соҳага қандай таъсир қилади?
– Биласизми, ўзига ишонган тадбиркор ҳар доим ёнида рақобатчи борлигини ҳис қилса, ўсиш бўлади. Рақобат бўлмаган жойда ривожланиш секинлашади. Нафақат бизнесда, балки ҳаётнинг ҳар жабҳасида рақобат бўлиши керак.
– Мамлакатимизда ўз бизнесини йўлга қўйишга уринаётган бўлажак тадбиркорларга маслаҳатингиз?
– Аввало ҳар бир ишда ислоҳотларга ишонишимиз, таҳлил қилиб чуқур ўрганишимиз керак. Тажрибамдан келиб чиқиб айтадиган бўлсам, ҳар қандай лойиҳани бошлашдан ҳеч қўрқмаслик керак, дадил, олға бориб уни амалиётга киритиш учун ҳаракат қилиш керак.
– Президентимизнинг тадбиркорлар билан ўтказган очиқ мулоқотида кўтарилган масалаларга қандай муносабат билдирасиз?
– Дарҳақиқат, яқинда Президентимизнинг тадбиркорлар билан навбатдаги очиқ мулоқоти ўтказилди. Бунда бешта устувор йўналиш белгилаб берилди. Маълумки, бугунги кунда мамлакатимизда фаолият юритаётган ҳар бир тадбиркор ўз имижига эга бўлди. Тадбиркор сўзи брендга айланди. Янги давр, Янги Ўзбекистон учун алоҳида синф сифатида кириб келди. 20 август Тадбиркорлар куни сифатида белгиланди. Ҳар бир тадбиркор шу кунни кутадиган бўлди.
Тадбиркорлар учун алоҳида банкнинг ташкил қилиниши, қўшимча имтиёзларнинг берилиши, хусусан, кичик тадбиркорларни ўрта синфга ўтказиш каби масалалар ҳаётга татбиқ этилиши учун нафақат давлат, балки ишбилармонларнинг ўзини ҳам масъул деб ўйлайман. Биз давлат билан ижтимоий ҳамкорликни кучайтириб, мазкур масалаларни биргаликда ҳал этсак, мамлакатимиз иқтисодиёти ривожига катта ҳисса қўшган бўламиз.
<iframe width="650" height="420" src="https://www.youtube.com/embed/e17gwNoptkM" title="Бизнесда рақобатнинг ўрни, имкониятлар тадбиркорга нима бермоқда?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>ЎзА мухбири
Абдулазиз РУСТАМОВ
суҳбатлашди.