Беларусь ЕИ билан шартларсиз мулоқот қилиш тарафдори
Беларусь ташқи ишлар вазири ўринбосари Игорь Секрета Европа Иттифоқи билан муносабатларни яхшилаш ва сиёсий мулоқотни тиклаш муҳимлигини таъкидлади. Бу ҳақда у Германиянинг “Berliner Zeitung” нашрига берган интервьюсида маълум қилди.
Дипломатнинг фикрича, Европада хавфсизлик ва ҳамкорлик ташкилоти (ЕХҲТ) доирасида очиқ, холис ва профессионал мунозаралар учун имкониятлар чекланган. Шу боис, халқаро муносабатларда ўзаро ишончни тиклаш ва зиддиятларни дипломатик йўл билан ҳал этиш зарур.
Секрета Россия ва Хитой Беларуснинг асосий стратегик ҳамкорлари бўлиб қолаётганини қайд этди. Унинг сўзларига кўра, минтақавий инқирозларга қарамай, ХХР билан савдо ҳажми ортиб, йирик инвестиция лойиҳалари амалга оширилмоқда.
Шунингдек, дипломат Евроосиё қитъасининг келажакдаги барқарорлиги Шарқ ва Ғарб ўртасидаги ҳамкорлик ҳамда иқтисодий алоқаларни ривожлантиришга боғлиқлигини таъкидлади.
Мулозим Минск Пекиннинг глобал ташаббусларини қўллаб-қувватлаётгани, Москва таклифларини ўрганаётгани ва АҚШ президенти Дональд Трамп ташаббусларини диққат билан кузатаётганини маълум қилди.
У ЕИ билан муносабатларда ҳам ижобий ўзгаришлар бўлишига умид билдирди. Бироқ дипломатнинг айтишича, Брюсселнинг қарор қабул қилиш тартиби ва айрим сиёсий шартлари мулоқотни тиклашга тўсқинлик қилмоқда.
И.Секрета мавжуд келишмовчиликларни юмшатиш ва кескинлашувнинг олдини олиш учун Европа Иттифоқи билан ҳеч қандай дастлабки шартларсиз музокара олиб бориш зарурлигини қайд этди.
А.Маматов, ЎзА
