Бангкокнинг барча туманлари офатдан зарарланган
Тайланд пойтахти Бангкокда кучли ёмғир оқибатида юзага келган тошқин сабаб шаҳарнинг барча 50 тумани офатдан зарарланган ҳудуд, дея эълон қилинди.
Маълумотга кўра, кучли ёғин натижасида кўча ва асосий йўлларни сув босиб, транспорт ҳаракати издан чиққан. Сув сатҳи кескин кўтарилиши туфайли айрим ҳудудларда аҳолини кўчиришга тўғри келган.
Губернатор Чатчат Ситтипунт мегаполиснинг шарқий қисми энг кўп зарар кўрган ҳудуд эканини айтди. Ариқларга яқин истиқомат қилувчи аҳолига алоҳида эҳтиёткорлик чорасини кўриш тавсия этилган.
Шаҳар маъмурияти сувни чиқариш учун насос станцияларини тўлиқ қувватда ишлатмоқда. Умумий қувват сониясига қарийб 1 200 куб/метр сувни чиқариш имконини беради. Шунингдек, аҳолини офатдан ҳимоя қилиш мақсадида вақтинча бошпана марказлари ташкил этилган, бир миллион дона қум халтаси тайёрланган.
Метеорология департаменти 26-27 сентябрь кунлари мамлакатнинг қатор ҳудудларида кучли ёғингарчилик давом этиши мумкинлигидан огоҳлантирди.
26 сентябрь ҳолатига кўра, 21 музофотда 84 000 дан кўп одам тошқиндан зарар кўрган. Марказий ҳудудлар энг кўп таъсирланган минтақалар қаторида қайд этилган.
Ҳодиса транспорт ва ҳаво қатновига ҳам таъсир кўрсатди. Сув босган йўлда ҳаракатланиш қийинлашгани боис, Суварнабхуми ва Дон Муанг аэропортларига бораётган йўловчиларга йўлга олдинроқ чиқиш тавсия этилган.
Маълум қилинишича, кучли шамол туфайли Таиланд қўлтиғи юқори қисми ва Андаман денгизида тўлқин баландлиги 2-3 метр кўтарилган, момақалдироқ кузатилган ҳудудларда эса янада юқорилаши мумкин. Кичик кемаларга 27 сентябргача денгизга чиқмаслик тайинланган.
Ҳокимият аҳоли расмий огоҳлантирилишини кузатиб бориш, сув босган йўлдан фойдаланмаслик ва зарурат туғилганда хавфсиз ҳудудга кўчиш бўйича кўрсатмага амал қилишга чақирди.
Нодира Қаюмова, ЎзА
