Австралиянинг йирик олтин компанияси миллиард долларлик харид таклифини рад этди
Австралиянинг энг йирик олтин қазиб олувчиларидан бири ҳисобланган “Northern Star Resources” компанияси Жанубий Африканинг “Gold Fields” фирмаси томонидан билдирилган 27, 1 миллиард долларли харид таклифини қабул қилмади.
Агар ушбу битим амалга ошганда, дунёдаги иккинчи энг йирик олтин ишлаб чиқарувчи гигант вужудга келган ва бу қитъа-давлат тарихидаги энг йирик харидлардан бирига айланган бўлар эди.
“Gold Fields” таклиф қилган нарх “Northern Star” акциясининг бозордаги ҳақиқий қийматидан бор-йўғи 14 фоиз юқори, холос. Ваҳоланки, Австралияда бундай йирик компанияларни сотиб олиш учун одатда камида 30 фоизлик устама нарх таклиф қилиниши талаб этилади. “Northern Star” раҳбарияти ушбу таклифни “компания аслида қанча туриши ҳисобга олинмаган ва фурсатдан фойдаланиб қолишга уринилган” дея баҳолади.
Шунга қарамай, “Gold Fields” музокарани давом эттиришга тайёрлиги ва битим ҳар икки томон учун салмоқли молиявий фойда келтиришини таъкидламоқда. Шу билан бирга, “Northern Star” акциясининг 6,2 фоизига эгалик қилувчи “Elliott” инвестиция жамғармаси ҳам компания раҳбариятини харидор билан жиддий музокара олиб бориш ва акциядорлар учун энг манфаатли қарорни қабул қилишга чақирмоқда.
Ф.Яхшибоева, ЎзА
