“Аванс” — “бўнак”: қонунчилик ҳужжатларидаги айрим атамалар ўзбекчалаштирилмоқда

Олий Мажлис Қонунчилик палатасининг навбатдаги мажлиси ўз ишини бошлади. Унда бир қатор қонун лойиҳалари ва парламент назорати фаолиятига оид масалалар муҳокамаси кўзда тутилган. Дастлаб “Ўзбекистон Республикасининг айрим қонун ҳужжатларига ўзгартиришлар киритиш тўғрисида”ги қонун лойиҳаси иккинчи ўқишда кўриб чиқилди.

Қайд этилганидек, мамлакатимизда норма ижодкорлиги фаолиятини янада такомиллаштириш, қонунчилик ҳужжатларини содда ва тушунарли тилда тайёрлаш бўйича тизимли ишлар амалга оширилмоқда. Шу билан бирга, бу жараёнларнинг ҳуқуқий асосларини мустаҳкамлаш долзарб аҳамиятга эга.

Ушбу қонун лойиҳаси билан бир қатор қонунчилик ҳужжатларида фойдаланилган айрим атамаларни ягона шаклда қўллашни назарда тутувчи ўзгартиришларни киритиш таклиф этилмоқда. Хусусан,

“аванс” — “бўнак”,

“маркировка” — “тамғалаш”,

“маршрут” — “йўналишли”,

“светофор” — “йўлчироқ”,

“парол” — “ўрон”,

“прогрессив” — “илғор” деб ўзгартириш назарда тутиляпти.

Қонун лойиҳасининг қабул қилиниши қонун ҳужжатларидаги тушунча ва юридик атамаларни бирхиллаштириш, ўзбек тилининг давлат тили сифатидаги мақомини янада юксалтиришга хизмат қилади.

Қонун лойиҳаси учинчи ўқишда қабул қилиниб, Сенатга юборилди.

Муҳтарама Комилова,

Фарҳод Абдурасулов (сурат),

ЎзА