Аргентина Президенти Хавьер Милей маъмурияти таркибидаги Разведка агентлиги журналист, сиёсатчи ва иқтисодчиларни кузатиш имконини берадиган янги режа маъқуллангани ҳақидаги маълумотларни рад этди. Бу ҳақда CNN ёзди.

Журналист Уго Алконада Мон “La Nacion” газетасида ёзишича, у Давлат разведка котибияти (СIDE) ошкор қилган миллий разведка режасини кўриб чиққан. Терроризмнинг олдини олиш ва уюшган жиноятчиликка қарши курашиш каби анъанавий мақсадлар белгиланган лойиҳада, айни пайт, айрим " муваффақиятсиз умумлаштиришлар, ноаниқликлар" мавжуд.

– Масалан, ушбу тармоқ халқ хавфсизлигини таъминлашга масъул амалдорга нисбатан жамоатчилик ишончини “йўқотиш”га интилаётган ҳар қандай шахс тўғрисида маълумот тўплаш ҳуқуқига эга бўлади, бироқ хорижий агент, эксперт, журналист ёки оддий фуқарога ишора қилинаётганини аниқ кўрсатмайди, – дейилган мақолада.

Милей идораси 25 май куни янги разведка режаси мавжудлигини тасдиқлади, аммо ҳужжат айни мақсадда фойдаланилишини инкор қилди.

Алконада Мон таъкидлашича, талқинлардан бирига кўра, мазкур режа Россиянинг бошқа мамлакатлардаги сайловларга таъсир ўтказишга уриниши каби хорижий кучлар томонидан амалга ошириладиган эҳтимолий ҳаракатларга қарши туриш учун мўлжалланган.

– Хуллас, суверен давлат сифатида биз чет кучлар бундай амалиётга журъат қилмаслигини таъминлашимиз керак, – дейди Алконада. Айни ҳолатда мақсад тўғри йўналтирилган. Фақат ҳужжат аслида, таҳлилчи, сиёсатчи, журналист ёки фикрини эркин билдира оладиган бошқа ҳар қандай кишига ҳам тегишли бўлиши мумкин.

Мусулмон Зиё, ЎзА