АҚШнинг янги қонун лойиҳаси “Mercedes-Benz” автомобиллари сотувига тақиқ қўйиши мумкин
“Reuters” нашри хабарига кўра, АҚШ Сенатига киритилган янги қонун лойиҳаси Германиянинг “Mercedes-Benz” автоконцерни учун жиддий молиявий хавф туғдирмоқда.
Ҳужжатга кўра, агар авто ишлаб чиқарувчи акцияларнинг 15 фоиздан ортиғи Хитой инвесторларига тегишли бўлса, компания автомобилларини АҚШга олиб кириш ва сотиш тақиқланиши мумкин. Ҳозирда “Mercedes” акцияларининг қарийб 10 фоизи ХХРнинг “BAIC” компаниясига, яна 10 фоизга яқини эса хитойлик тадбиркор Ли Шуфуга тегишли.
Қизиқарли жиҳати, “Mercedes” изоҳига кўра, ҳеч бир хитойлик инвестор алоҳида ҳисобда 10 фоизлик чегарадан ошмайди, кузатув кенгашида қатнашмайди ва бошқарувга таъсир ўтказа олмайди. Шунингдек, компания Алабама ва Жанубий Каролинадаги заводлари орқали 160 мингга яқин америкаликни иш билан таъминлаб, Қўшма Штатлар иқтисодиётига катта ҳисса қўшаётганини эслатди.
Ҳозирда АҚШ Сенатида муҳокама қилинаётган ушбу ташаббусга сенатор Тед Круз қарши чиқиб, 15 фоизлик мезонни бекор қилишни таклиф этди. Унинг фикрича, бу чеклов АҚШнинг “General Motors” компанияси фойдасига “Mercedes”га босим ўтказиш учун ўйлаб топилгандек кўринмоқда. Шунга қарамай, қонун муаллифлари, жумладан сенатор Берни Морено атайлаб “Mercedes”ни тақиқлашни мақсад қилмаганини ва зарур ҳолларда Савдо вазирлигидан алоҳида рухсатнома олиш мумкинлигини айтди.
Ф.Яхшибоева, ЎзА
