АҚШнинг янги бож сиёсати: Трамп қарори глобал фармацевтика бозорига қандай таъсир қилади?

Оқ уй раҳбари Дональд Трамп АҚШга тиббий дориларни экспорт қиладиган айрим хорижий давлатларга нисбатан 100 фоизлик бож жорий этди. Бу чора глобал фармацевтика бозори ва унинг истеъмолчилари учун нимани англатади?

Таъкидланишича, бу чора Қўшма Штатлар билан савдо келишуви мавжуд бўлмаган давлатлар маҳсулотларига нисбатан қўлланилади.

Йирик компаниялар учун бож 120 кундан сўнг, кичик ишлаб чиқарувчилар учун эса 180 кундан кейин кучга киради. Европа Иттифоқи, Япония, Жанубий Корея, Швейцария ва Лихтенштейндан келадиган дориларга 15 фоиз бож қўлланади. Буюк Британияда ишлаб чиқарилган маҳсулотлар эса пастроқ ставкаларга эга, чунки ушбу давлат АҚШ билан соҳавий келишув тузган.

Шунингдек, АҚШ Соғлиқни сақлаш ва савдо вазирликлари билан келишувга эришган компаниялар бождан озод қилинади ёки 20 фоиз ставка билан импорт қилиш имконига эга бўлади. 

Ф.Яхшибоева, ЎзА