АҚШ ва Эрон муваққат сулҳ эълон қилди
АҚШ ва Эрон ўртасидаги кескинлик кутилмаган йўналиш олди: икки ҳафталик ўт очишни тўхтатиш бўйича келишув минтақа келажагига қандай таъсир қилади?
АҚШ ва Эрон икки ҳафта муддатга ўт очишни тўхтатиш бўйича келишувга эришди. Бу ҳақда Президент Дональд Трамп расман баёнот берди. Мазкур дипломатик битим минтақадаги кескинликни юмшатиш, ҳарбий тўқнашув кўламини чеклашга қаратилган муҳим қадам сифатида баҳоланмоқда.
Ҳужжатга кўра, Эрон зиммасига сулҳ даврида стратегик аҳамиятга эга Ҳурмуз бўғози орқали кемаларнинг эркин ҳаракатини таъминлаш мажбурияти юкланган. АҚШ томони ушбу йўлак очиқ ва хавфсиз бўлиши келишувнинг асосий шарти эканини таъкидлади. Шунингдек, Америка ҳарбий кучлари Ислом Республикасига қарши зарбаларни вақтинча тўхтатди, Исроил ҳам музокара давом этаётган пайтда ҳужумни чеклашга розилик билдирди.
Жараённинг кейинги босқичига Покистон воситачилик қилади. Мамлакат Бош вазири ташаббуси билан яқин кунларда Исломобод шаҳрида АҚШ ва Эрон делегациялари иштирокида юзма-юз музокара ўтказилиши кутиляпти. Трамп Теҳрон илгари сурган 10 банддан иборат тинчлик режасини мулоқот учун асос сифатида баҳолади.
Ф.Яхшибоева, ЎзА
