АҚШ Суриядаги ҳарбий иштирокини тугатди(ми)?

“North Press Agency” ахборот агентлиги хабар беришича, АҚШ бошчилигидаги халқаро коалициянинг сўнгги ҳарбий карвони Суриянинг Эл-Ҳасака ҳудудидаги "Касрак" базасини тарк этди.

Мақолада ҳудуд назорати Сурия армиясига ўтказилгани таъкидланган. Нашр Америка қўшинлари ва техникасининг олиб чиқилиши ва Сурия ҳарбий хизматчиларининг келиши ҳақидаги тегишли видеолавҳаларни эълон қилди. Экспертлар фикрича, бу Қўшма Штатларнинг Сурияда қуруқликдаги ҳарбий иштирокининг тўлиқ якунланиши эканлигини англатади.

Ушбу хабарлардан сўнг, Сурия Мудофаа вазирлиги мамлакат қўшинларининг базага киришини тасдиқлади. Сурия Ташқи ишлар вазирлиги АҚШ қўшинлари жойлашган ҳарбий иншоотларни Сурия ҳукуматига якуний топшириш бошланишини олқишлади. Вазирлик бу “SDF” кучларининг мамлакат миллий тузилмаларига муваффақиятли интеграциялашуви натижаси эканлигини таъкидлади.

Шунингдек, ушбу ўлка ҳукумати халқаро ҳамжамият билан ҳамкорликда терроризмга қарши курашишга тайёрлигини маълум қилди.

С.Раҳимов, ЎзА