Nike ва Hyperice спортчиларга оёқлар тезроқ қизиб олиши ва тикланишига ёрдам берадиган футуристик Hyperboot кроссовкаларини сотувга чиқарилишини эълон қилди.

Ушбу модель биринчи марта ўтган ёзда тақдим этилган эди. Жорий йил 17-май куни Шимолий Америкада 899 доллардан сотувга чиқарила бошлайди. Кейинчалик бошқа мамлакатларда ҳам сотувга чиқариш режалаштирилган.

Hyperboot  — бу икки хил ҳаво камераси ва иситиш элементларидан иборат тизим билан жиҳозланган баланд кроссовкалар бўлиб, улар бутун пойабзал устига бир текис иссиқлик тарқатади. Компрессия ва иситишнинг комбинацияси оёқ ва тўпиқ мушакларини фаоллаштиради, бу эса машғулот бошланишидан олдин ҳам ўзингизни енгил ҳис қилишингизга ёрдам беради.

Моделни синовдан ўтказган профессионал спортчилар ва ҳаваскорлар ушбу технология уларнинг одатий қизиб туриш ва тикланиш жараёнларини, нафақат жисмоний, балки руҳий жиҳатдан ҳам сезиларли даражада яхшилаганини таъкидлайдилар. Париж олимпиадаси чемпиони Ша Керри Ричардсон Hyperboot саёҳатлар ва мусобақаларда вақтни тежашга ёрдам беришини ва унинг оёқлари йўлга чиқишдан олдин ҳам стартга тайёр бўлишини айтди.

Пойабзал учта иситиш даражасини — 44, 48 ва 52 °С ва учта компрессия режимини — 50, 130 ва 210 мм Ҳг таклиф этади. Созламаларни кроссовкалардаги тугмалар ёрдамида қўлда, шунингдек, Hyperice мобил иловаси орқали ўзгартириш мумкин. Ўрнатилган батареялар 1,5 соатгача автоном ишлайди. Бир жуфт пойабзалнинг оғирлиги 1,7 кг.

<iframe width="640" height="420" src="https://www.youtube.com/embed/fKvK2-Mgaao" title="Aqlli krossovkalar sotuvga chiqariladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Улуғбек Тўхтаев (видео), ЎзА