Анвар Анваровни “Brilliant Liga”да жиддий рақиблар кутмоқда
Хитойнинг Шанхай шаҳрида енгил атлетика бўйича “Brilliant Liga” мусобақасининг илк босқич баҳслари бўлиб ўтади. Мазкур нуфузли мусобақада мамлакатимиз шарафини Анвар Анваров ҳимоя қилади.
Эркаклар ўртасида узунликка сакраш баҳсларида дунёнинг энг кучли атлетлари ғолиблик учун кураш олиб боради. Унда Анварга жаҳон рейтинги етакчиси италиялик Маттиа Фурлани, рейтингда тўртинчи ўринда бораётган болгариялик Божидар Сарбоюков, шунингдек, кучли бешликдан жой олган австралиялик Лиам Эдкок каби машҳур спортчилар рақиблик қилади.
Атлетлар учун мазкур мусобақа очиқ стадионда ўтадиган мавсум олдидан ўзига хос жиддий синов вазифасини ўтайди. Шу боис ҳар бир иштирокчи қишки тайёргарлик жараёни самарасини намоён этишга интилади.
Қайд этиш жоиз, Шанхай босқичи дастури бўйича эркаклар ўртасидаги узунликка сакраш баҳслари мусобақанинг илк йўналиши сифатида старт олади. Бироқ ушбу тур "Brilliant Liga"нинг йиллик очко жамғариш тизими учун рейтинг очколарини тақдим этмайди.
Эслатиб ўтамиз, Анвар Анваровнинг ўтган мавсумдаги энг ёрқин натижаларидан бири Лозаннада ўтган “Brilliant Liga” босқичида қайд этилган эди. Ўшанда ҳамюртимиз 7,84 метр натижа билан барча рақибларини ортда қолдириб, “Brilliant Liga” мусобақасида ғолиб чиққан иккинчи ўзбекистонлик атлет сифатида тарихга кирган.
Жавоҳир Тошхўжаев,
ЎзА
