Angliyada yangi mavsum nafasi: Premyer Liga startida ilk katta sinovlar
O‘tgan mavsum «Arsenal»ning chempionligi bilan yakunlandi.
Dunyoning eng ko‘p kuzatiladigan milliy chempionatlaridan biri — Angliya Premyer Ligasi 2026/27-yilgi mavsumni boshlash arafasida. 21-avgust kuni start oladigan yangi mavsumning dastlabki turidayoq bir qator qiziqarli uchrashuvlar muxlislarni kutmoqda. Amaldagi chempion «Arsenal» titul himoyasini yangi jamoaga qarshi boshlasa, «Fulhem» va «Chelsi» o‘rtasidagi London derbisi turning yakuniy nuqtasini qo‘yadi.
O‘tgan mavsum «Arsenal»ning chempionligi bilan yakunlandi. Shu tariqa londonliklar 2003/04-yilgi afsonaviy mavsumdan keyin uzoq kutilgan Premyer Liga chempionligini yana qo‘lga kiritdi. Yangi mavsumda esa chempionat tarkibiga «Koventri Siti», «Ipsvich Taun» va «Hall Siti» qo‘shildi.
«Arsenal» — «Koventri Siti»
Yangi mavsum 21-avgust kuni amaldagi chempion «Arsenal» va Premyer Ligaga qaytgan «Koventri Siti» uchrashuvi bilan boshlanadi.
Mikel Arteta boshchiligidagi «Arsenal» uchun vazifa endi chempionlikni qo‘lga kiritish emas, uni himoya qilish. Londonliklar o‘tgan mavsum Angliyaning eng kuchli jamoasi bo‘la oldi va endi barcha raqiblar aynan chempionga qarshi alohida motivatsiya bilan maydonga tushadi.
«Koventri Siti» esa Premyer Ligaga 25 yillik tanaffusdan keyin qaytdi. Frenk Lempard boshqaruvidagi jamoa Chempionship chempioni sifatida yuqori divizion yo‘llanmasini qo‘lga kiritdi. Premyer Ligadagi ilk sinovning amaldagi chempion maydonida bo‘lishi «Koventri» uchun yangi darajaning qanchalik murakkab ekanini darhol ko‘rsatib beradi.
«Hall Siti» — «Manchester Yunayted»
22-avgustdagi dastlabki uchrashuvda yana bir yangi jamoa — «Hall Siti» o‘z maydonida «Manchester Yunayted»ni qabul qiladi.
«Manchester Yunayted» yangi mavsumni Maykl Kerrik boshchiligida boshlaydi. Klub uchun so‘nggi yillardagi beqarorlikdan keyin chempionatning dastlabki turlaridanoq natija ko‘rsatish katta ahamiyatga ega.
«Hall Siti» esa o‘z muxlislari qarshisida Premyer Ligaga qaytishini Angliyaning eng nomdor klublaridan biriga qarshi nishonlaydi. Qog‘ozda mankunianliklar favorit bo‘lishi mumkin, biroq yangi jamoalarning mavsum boshidagi yuqori motivatsiyasi «Yunayted» uchun uchrashuvni ancha murakkablashtirishi mumkin.
«Nottingem Forest» — «Lids Yunayted»
«Nottingem Forest» yangi mavsumni «Lids Yunayted»ga qarshi uy uchrashuvi bilan boshlaydi.
«Forest»da yoz davomida muhim o‘zgarish yuz berdi va jamoani endilikda Oliver Glasner boshqaradi. Shu bois birinchi tur nafaqat uch ochko uchun kurash, balki yangi murabbiy g‘oyalarining Premyer Ligadagi ilk jiddiy imtihoni ham bo‘ladi.
«Lids» esa safardagi murakkab uchrashuv orqali yangi mavsumga kirib keladi. Birinchi turdayoq ochko olish har ikki jamoaga keyingi bahslar oldidan muhim ruhiy ustunlik berishi mumkin.
«Everton» — «Kristal Pelas»
«Everton» va «Kristal Pelas» o‘rtasidagi uchrashuvda ham murabbiylar omili alohida e’tiborga loyiq.
«Everton» Devid Moyes boshchiligida yangi mavsumni boshlasa, «Kristal Pelas»ni Pyer Saj boshqarmoqda. London klubidagi murabbiy almashinuvi tufayli jamoaning yangi taktik qiyofasi qanday bo‘lishi birinchi turdagi qiziqarli savollardan biridir.
«Ipsvich Taun» — «Sanderlend»
Birinchi turning o‘ziga xos uchrashuvlaridan yana biri «Ipsvich Taun» va «Sanderlend» o‘rtasida kechadi.
«Ipsvich» Premyer Ligaga qaytgan uch jamoadan biri. Gari O’Nil boshchiligidagi klub uchun o‘z maydonidagi dastlabki uchrashuvda ijobiy natija qayd etish ayniqsa muhim. «Sanderlend» esa Rejis Le Bris bilan yuqori diviziondagi o‘rnini yanada mustahkamlashni ko‘zlamoqda.
«Brentford» — «Tottenhem»
Londonning ikki vakili «Brentford» va «Tottenhem» ham ilk turdayoq o‘zaro to‘qnash keladi.
«Tottenhem» yangi mavsumga Roberto De Dzerbi boshchiligida kirib kelmoqda. Italiyalik mutaxassisning hujumkor va to‘p nazoratiga asoslangan futbol falsafasi tufayli «shporlar»ning yangi mavsumdagi o‘yini katta qiziqish uyg‘otmoqda. «Brentford»ni esa Kit Endryus boshqaradi.London derbisida mavsum boshidagi jismoniy tayyorgarlik, yangi taktik g‘oyalar va individual mahorat hal qiluvchi ahamiyat kasb etishi mumkin.
«Brayton» — «Aston Villa»
Yakshanba kungi dastur «Brayton» va «Aston Villa» uchrashuvi bilan davom etadi.
Fabian Hyurtseler boshchiligidagi «Brayton» o‘z maydonida doim xavfli raqib bo‘lib kelgan. «Aston Villa» esa Unai Emeri qo‘l ostida so‘nggi yillarda yuqori maqsadlar uchun kurashadigan jamoaga aylandi.
Shu sabab mazkur uchrashuvda mavsumning ilk uch ochkosi bilan birga yuqori o‘rinlar uchun kurashni muvaffaqiyatli boshlash masalasi ham o‘rtaga chiqadi.
«Manchester Siti» — «Bornmut»
«Manchester Siti» yangi mavsumni o‘z maydonida «Bornmut»ga qarshi boshlaydi.
Manchester klubida katta o‘zgarish bor — jamoani endilikda Enso Mareska boshqaradi. «Bornmut»da ham murabbiy almashgan va klub boshqaruvi Marko Rozega topshirilgan. Demak, bu uchrashuv ikki yangi murabbiy uchun ham Premyer Ligadagi yangi bosqichning boshlanishi bo‘ladi.
«Siti» tabiiy ravishda yuqori maqsadlarni ko‘zlaydi. «Bornmut» esa favorit maydonida bosimsiz o‘ynab, mavsumning dastlabki sensatsiyalaridan birini yaratishga urinadi.
«Nyukasl» — «Liverpul»
Birinchi turning markaziy bahslaridan biri shubhasiz «Nyukasl» va «Liverpul» uchrashuvi bo‘ladi.
Har ikki jamoa yangi murabbiy bilan mavsum boshlamoqda. «Liverpul» boshqaruviga Andoni Iraola kelgan bo‘lsa, «Nyukasl» Mattias Yayslega ishonch bildirdi. Premyer Liga 5-avgust kuni Yaysle tayinlangach, yangi mavsumda qatnashadigan barcha 20 klubning murabbiylar tarkibi to‘liq shakllanganini ma’lum qilgan.
«Nyukasl»ning o‘z maydonidagi yuqori intensiv futboli va «Liverpul»ning yangilanayotgan o‘yin modeli ushbu uchrashuvni turning eng qiziqarli qarama-qarshiliklaridan biriga aylantiradi.
«Fulhem» — «Chelsi»
Birinchi tur 24-avgust kuni London derbisi bilan yakunlanadi. «Fulhem» o‘z maydonida «Chelsi»ni qabul qiladi.
Bu uchrashuvga qiziqishni oshiradigan asosiy jihatlardan biri — har ikki klubning yangi murabbiy bilan mavsum boshlayotganidir. «Fulhem» boshqaruviga Alvaro Arbeloa kelgan bo‘lsa, «Chelsi»ni Xabi Alonso boshqarmoqda.
Ayniqsa, «Chelsi»ga katta e’tibor qaratiladi. Xabi Alonso davrining Premyer Ligadagi ilk rasmiy uchrashuvi darhol London derbisiga to‘g‘ri kelmoqda. Yozgi transfer oynasida tarkibda ham o‘zgarishlar bo‘ldi va yangi murabbiy qo‘l ostidagi «Chelsi»ning qanday futbol namoyish etishi mavsum boshidagi asosiy intrigalar qatorida turibdi. Premyer Liganing o‘zi ham Alonso boshchiligidagi yangi «Chelsi»ni 2026/27-yilgi mavsumni kutishga sabab bo‘ladigan asosiy omillardan biri sifatida ko‘rsatgan.
«Fulhem» esa o‘z maydonida shahardoshining yangi loyihasiga ilk zarbani berishga urinadi. Shu bois birinchi turning so‘nggi uchrashuvi oddiy uch ochkolik bahsdan ko‘ra ko‘proq — yangi murabbiylar, yangi g‘oyalar va London derbisi hissiyotlarini birlashtiradigan to‘qnashuv bo‘lishi kutilmoqda.
Yangi mavsum — yangi savollar
2026/27-yilgi Premyer Liga mavsumi 21-avgust kuni boshlanib, 2027-yil 30-may kuni yakunlanadi. 20 jamoa 38 tur davomida jami 380 uchrashuv o‘tkazadi.
«Arsenal» chempionlikni himoya qila oladimi? Xabi Alonso «Chelsi»ni yana chempionlik poygasiga qaytara oladimi? Yangilangan «Manchester Siti», «Liverpul» va «Manchester Yunayted» qanday natija ko‘rsatadi? Premyer Ligaga qaytgan «Koventri Siti», «Ipsvich Taun» va «Hall Siti» elitada qolishga qodirmi?
Bu savollarga javob uzoq mavsum davomida ma’lum bo‘ladi. Ammo bir narsa aniq: Angliyada futbol yana boshlanmoqda va birinchi turning o‘zidayoq yangi mavsumning dastlabki katta hikoyalari yoziladi.
