Президентимизнинг жорий йил 28 январдаги “2022-2026 йилларга мўлжалланган Янги Ўзбекистоннинг тараққиёт стратегияси тўғрисида” ги фармони асосида ишлаб чиқилган “Инсон қадрини улуғлаш ва фаол маҳалла йили”да амалга оширишга оид Давлат дастуридан келиб чиқиб Андижон вилоятини ижтимоий-иқтисодий ривожлантириш дастури ҳамда 2022 йилда унинг ижросини таъминлаш бўйича “йўл харитаси” ишлаб чиқилди.

Мазкур ҳужжатга асосан, жорий йилда вилоятда ижтимоий соҳани ривожлантиришга қаратилган қатор ишларни амалга ошириш белгиланган. Жумладан, жорий йилда вилоятда мактабгача таълим ёшидаги болалар қамровини 75 фоиздан 82 фоизга етказиш мақсадида 1 та янги давлат, 14 та давлат-хусусий шериклик, 306 та оилавий мактабгача таълим ташкилоти ташкил этилади, 17 та давлат МТТлари реконструкция қилинади.  
Мактабларни моддий-техник базасини мустаҳкамлаш мақсадида 3 та янги мактаб қурилади, 19 таси реконструкция ва капитал таъмирланади. Натижада 7 мингдан ортиқ янги ўқув ўринлари яратилади. 

[gallery-5889]

Вилоятда 2 та хусусий олийгоҳ – Ҳиндистоннинг Глокал унивeрситeти филиали ҳамда Само кластер инновацион технологиялар институти ташкил этилади. Талабаларни турар-жой билан таъминлаш мақсадида қўшимча 1 минг 600 ўринли 4 та янги талабалар ётоқхонаси барпо этилади.  
Тиббиёт муассасаларининг моддий-техника базасини мустаҳкамлаш мақсадида 4 та янги оилавий поликлиника, 9 та маҳаллада оилавий шифокорлик пункти ташкил этилади. Вилоятдаги 6 та тиббиёт муассасасида қурилиш-таъмирлаш ҳамда жиҳозлаш ишлари бажарилади. 
Андижон давлат тиббиёт институти клиникаси тўлиқ реконструкция қилиниб, унинг негизида водий аҳолиси учун мураккаб жарроҳлик амалиётлари ўтказиладиган Тиббиёт маркази ташкил этилади. Бундан ташқари, Ҳиндистон Республикаси билан ҳамкорликда кардиология маркази ташкил этилади.  
Белгиланган юқоридаги ишларнинг амалга оширилиши мактабгача таълим, таълим, олий таълим тизимлари имкониятларини янада кенгайтиради, шунингдек, аҳолига кўрсатиладиган тиббий хизмат сифатини ҳамда аҳолининг турмуш фаровонлигини юксалтиришга хизмат қилади.  

 

Ф. УБАЙДУЛЛАЕВ, 
З. УМРЗОҚОВ (сурат), 
ЎзА