Кеча Аляска қирғоқлари яқинида 7,2 магнитудали зилзила содир бўлганидан сўнг, ушбу ҳудуднинг жанубий ярим оролида цунами бўйича огоҳлантириш бекор қилинди. Бу ҳақда “CBS News” нашри маълум қилмоқда.

Ижтимоий тармоқларда тарқалган видеоларда Севард шаҳридаги маҳаллий аҳоли вакиллари цунами ҳақида огоҳлантириш олганидан кейин эвакуация қилинаётгани акс этган.

АҚШ Геология хизмати маълумотларига кўра, зилзила эпицентри Санд-Поинт аҳоли пунктидан 87 км жанубда қайд этилган. Зилзила эпицентри 20,1 км чуқурликда. 

– Гап шундаки, бу табиат ҳодисаси саёз сувда содир бўлди, - деди АҚШ Океан ва атмосфера маъмуриятининг цунами ҳақида огоҳлантириш координатори Дейв Снайдер ўз интервьюсида. – Ўйлашимча, йирик сув тўлқинлари қирғоқ томон етиб келолмайди. 

ОАВ хабарларида қурбонлар ва вайронагарчиликлар ҳақида ҳозирча ҳеч нима дейилмаяпти.

Маълумот ўрнида, Алясканинг жанубий қирғоғи доимо сейсмик фаол Тинч океанининг “Олов ҳалқаси” бўйлаб жойлашган. Шимолий Америкада қайд этилган энг кучли ер қимирлаши 1964 йил март ойида юз берган, ўшанда 9,2 магнитудали зилзила 250 дан ортиқ одамнинг ҳаётига зомин бўлганди.

Ў.Алимов, ЎзА