Пойтахтимиздаги “CAEx Uzbekistan” халқаро кўргазмалар марказида “InnoWeek-2025” – инновацион ғоялар халқаро ҳафталигининг иккинчи кунги тадбирлари ўтказилмоқда.

Унда Қўқон университети Андижон филиали жамоаси ҳам ўз имкониятларини намойиш қиляпти. 

Мазкур филиалнинг илмий тадқиқот департаменти мутахассиси Акрам Худойбердиевнинг таъкидлашича, ҳафталик соҳа вакилларини илмий изланишга ундайди. Жамоа ўтган йилги намойишда 4 та илмий ишланмани тақдим этган бўлса, бу гал уларнинг сони 8 тани ташкил этади. 

– Ҳафталикда қатнашиш ҳар жиҳатдан фойдали. Негаки, бу йил 30 мамлакат вакиллари ўз янгиликларини намойиш қилмоқда, – деди у. – Бу биз учун тажриба, илмий кўникма ва ҳамкорлик имконияти деганидир. 

[gallery-25685]

Стендимиздан экология, тиббиёт, таълим ва технология йўналишларида ишлаб чиқилган 8 та инновацион лойиҳа ўрин олган. Бу “Экологик қуруқ ёқилғи”, “Ақлли экоскамейка”, “Робо-Т 01 манипулятори”, “Йўтал STOP”, “Calm AURA”, “Iody Jelly”, “IF – онлайн таълим платформаси” ишланмаларидир. Бу лойиҳалар ўзининг илмий янгилиги, амалий аҳамияти ва технологик ёндашуви билан иштирокчилар, экспертлар ва инвесторлар эътиборини тортади. 

Бизнинг асосий мақсадимиз талабаларнинг илмий ва технология соҳасидаги салоҳиятини намоён этиш, уларни амалиёт билан уйғунлаштиришга қаратилган. Ҳар бир лойиҳа биз учун фан ва инновация орасидаги кўприк вазифасини бажаради. Шу каби инновацион тадбирларда иштирок этиш университетнинг илмий салоҳияти ва келажак авлод учун замонавий билимлар базасини яратишда муҳим қадам ҳисобланади. 

Ҳар бир лойиҳа нафақат илмий янгилик, балки унинг амалиётда қўлланилиши ва ҳаётга таъсирини кўрсатиши билан аҳамиятлидир. Шу боис, талабаларимизга замонавий технологияларни уйғунлаштирган ҳолда самарали ишлаш имконини яратишга шароитлар яратилмоқда. 

“InnoWeek-2025” Қўқон университети Андижон филиали талабалари ва профессор-ўқитувчилари учун илм-фан, технология ва инновациялар соҳасидаги ютуқларини намоён этишда муҳим майдондир. 

Насиба Зиёдуллаева, Ойбек Пардаев (сурат), ЎзА