27 нафар боксчимиз Осиё чемпионати финалида
Индонезиянинг Жакарта шаҳрида бокс бўйича U19 ва U23 ёш тоифасида ўтаётган Осиё чемпионати финал жангларининг барча иштирокчилари маълум.
Ўтказилган ярим финал жангларидан сўнг Ўзбекистон U19 ва U23 терма жамоаси аъзоларининг 27 нафари Осиё чемпионлиги учун кечадиган баҳсларда иштирок этадиган бўлди.
Миллий терма жамоалар кесимида финал йўлланмасини қўлга киритиш борасида ҳамюртларимиздан кейин иккинчи ўринни 22 нафар финалчи билан Қозоғистон терма жамоаси эгаллаб турибди.
Кейинги поғоналардан Ҳиндистон(18), Япония(4), Жанубий Корея (2), Қирғизистон(2), Индонезия (2) жой олган бўлса, Таиланд, Хитой Тайпейи, Мўғулистон жамоаларида 1 тадан йўлланма бор.
Бугун чемпионат дастурига мувофиқ иштирокчилар учун дам олиш куни сифатида белгиланган.
Эртага U19 ва U23 ёш тоифасида боксчи қизлар иштирокида Осиё чемпионати финаллари бўлиб ўтса, эркаклар ўртасидаги финал жанглари 16 июль куни ташкил этилади.
Т. Рўзиев, ЎзА
