Пахта чигити ва пахта мойини сотишнинг тартиби белгиланди
Ўзбекистон Республикаси Бош вазири ўринбосари Ш.Ғаниев 2020 йилнинг 2 декабрь куни имзолаган 03/1-3203-сонли йиғилиш баёнида пахтачилик кластерлари ва кооперациялар томонидан пахта хом ашёсини қайта ишлашдан олинган техник чигитни биржа савдолари орқали ёғ-мой корхоналарига сотиш ва ички истеъмол бозорида маҳаллий пахта мойи ва ўсимлик мойлари нархларини барқарор сақланишини таъминлашга қаратилган қўшимча чора-тадбирлар белгилаб берилди.
Мазкур баёнга асосан:
2020 йил пахта хом ашёсини қайта ишлашдан олинган техник чигитни тўғридан-тўғри шартнома асосида сотилишига йўл қўйилмайди;
Қишлоқ хўжалиги вазирлиги, Монополияга қарши курашиш қўмитаси ва Молия вазирлиги томонидан техник чигитни биржа савдоларига қўйишда нархларнинг асоссиз ошиши ва унинг тайёр маҳсулот таннархига салбий таъсир кўрсатишининг олдини олиш мақсадида пахта хом ашёсига белгиланган харид нархлари ва уни қайта ишлаш харажатларини ҳисобга олган ҳолда техник пахта чигитининг биржа савдоларига қўйиладиган бошланғич нархи белгилаб борилади;
Бош прокуратура ҳузуридаги Иқтисодий жиноятларга қарши курашиш департаменти, Давлат солиқ қўмитаси, Монополияга қарши курашиш қўмитаси, «Ўзагроинспекция» томонидан техник пахта чигитини технологик асбоб-ускуналари ва ишлаб чиқариш линиялари модернизация қилинмаган ўсимлик мойи ишлаб чиқарувчи субъектларга сотиш ҳолатларини бартараф этиш ва ҳудудларда яширинча ишлаётган «мойжувоз»лар фаолиятини фош этиш чоралари кўрилади;
Монополияга қарши курашиш қўмитаси Бош прокуратура ҳузуридаги Иқтисодий жиноятларга қарши курашиш департаменти, «Ўзагроинспекция» билан биргаликда ёғ-мой корхоналарида техник чигитдан ишлаб чиқарилган пахта мойининг биржа савдоларига қўйиладиган нархлари асоссиз ва сунъий равишда ошиб кетишининг олдини олиш мақсадида ёғ-мой корхоналарида ишлаб чиқарилаётган пахта мойининг таннархини ва унинг биржа савдоларига қўйиладиган бошланғич ва сотиш нархлари шаклланиши устидан назорат ўрнатадилар.
Мазкур баёнда берилган топшириқлар ижросини назорат қилиш вазифаси Вазирлар Маҳкамасининг Аграр ва озиқ-овқат соҳаларини ривожлантириш масалалари котибияти зиммасига юклатилди.
