Fevral oyida poytaxtda taxminan 4,5 mingta elektromobil sotilgan
Joriy yilning o‘tgan oyi yakunlariga ko‘ra, barcha turdagi avtotransport vositalari savdosining umumiy hajmi 84,2 ming donani tashkil etib, o‘tgan yilning shu davriga nisbatan 6,4 foizga oshdi.
Bu haqda Iqtisodiy tadqiqotlar va islohotlar markazi tomonidan 2026-yil fevral oyi yakunlari bo‘yicha O‘zbekiston avtomobil bozori dinamikasiga bag‘ishlangan yangilangan tahlilda batafsil so‘z yuritiladi. Tahlil bozorning asosiy segmentlarini, jumladan elektromobillar bozorini ham qamrab oladi.
Unga ko‘ra, avtomobil bozoridagi faollik o‘tgan oyga nisbatan ham ijobiy dinamikani namoyon etdi. Savdo hajmi 2 foizga o‘sdi, bu esa yanvar oyiga nisbatan taxminan 1,6 ming donaga ko‘payganini anglatadi.
Eng katta o‘sish Samarqand viloyatida kuzatilib, bu yerda savdo hajmi 65 foizga oshdi. Shuningdek, faollik Sirdaryo viloyatida 7,2 foizga, Toshkent viloyatida esa 12 foizga o‘sdi.
2026-yil fevral oyida mahalliy ishlab chiqarilgan yangi avtomobillar savdosi taxminan 24 ming donani tashkil etib, joriy yilning yanvar oyi darajasiga mos keldi. Shu bilan birga, o‘tgan yilning shu davriga nisbatan savdo hajmi 10,7 foizga oshdi.
Xorijda ishlab chiqarilgan yangi avtomobillar segmentida esa yanada yuqori o‘sish sur’ati qayd etildi. Savdo hajmi o‘tgan yilning fevral oyiga nisbatan 1,5 barobarga oshib, taxminan 3 ming donani tashkil etdi.
Yengil elektromobillar segmentida faollik barqaror o‘sishni davom ettirmoqda. Fevral oyida savdo hajmi 6,9 ming donani tashkil etib, bu o‘tgan oyga nisbatan 14 foizga ko‘p demakdir.
Yillik hisobda elektromobillar savdosi 1,5 barobarga oshdi. Bu esa ushbu bozor segmentining izchil kengayib borayotganini ko‘rsatadi.
Hududiy taqsimot shuni ko‘rsatadiki, elektromobillar savdosining asosiy qismi Toshkent shahri hissasiga to‘g‘ri keladi. Fevral oyida poytaxtda taxminan 4,5 mingta elektromobil sotilgan bo‘lib, bu ushbu segmentdagi umumiy savdo hajmining qariyb 65 foizini tashkil etadi.
Mohigul Qosimova,
O‘zA
