Юнон-рум курашчимиз “PWL 11” камарини қўлга киритди
Пойтахтимиздаги "Ҳумо арена" мажмуасида спорт курашлари бўйича дунёнинг энг кучли ва номдор спортчилари иштирокида ўтказилган “PWL 11” мусобақаси кутилганидан-да қизиқарли кечди.
Турнирда 24 жуфтлик иштирокида беллашувлар ташкил этилган бўлса, унинг марказий баҳси юнон-рум кураши бўйича Ўзбекистон терма жамоаси аъзоси, жаҳон ва қитъа чемпиони Айтжан Халмаханов ҳамда "Токио-2020" Олимпиадаси ғолиби, "Париж-2024" совриндори, жаҳон чемпиони, кубалик Луис Алберто Орта Санчес ўртасида кечди.
Муросасиз кечган беллашувда ҳамюртимиз Айтжан Халмаханов ҳар жиҳатдан ўз устунлигини намойиш қилди. -67 кг. вазн тоифасида Луис Албертони муддатидан аввал 10:0 ҳисобида мағлуб этган Халмаханов ушбу вазнда чемпионлик камарини қўлга киритди.
Қолган жуфтликларда ўзбекистонлик Разамбек Жамалов, Шерзод Поёнов, Ғуломжон Абдуллаев, россиялик Садик Лалаев, Иналбек Шериев, мўғулистонлик Тулга Тумур-Очир, қирғизистонлик Сезим Жуманазарова муваффақиятга эришди.
Т.Рўзиев, ЎзА
