Собиқ мудофаа вазири Украинада президентлик сайловини ўтказишга чақирди (+видео)
Украинанинг собиқ мудофаа вазири Михаил Фёдоров Россия билан уруш давом этаётган бўлса ҳам, сайлов ўтказиш имконини топиш кераклигини айтди. У бу фикрни Зеленский Украина Хавфсизлик хизмати собиқ раҳбари Евгений Хмарани мудофаа вазири лавозимига номзод сифатида илгари сурганидан бир неча соат ўтиб маълум қилди, деб хабар берди Euronews
Фёдоров истеъфога чиққанидан бир ой ўтиб, «Михаил Фёдоровнинг Украина халқига мурожаати» номли видеони эълон қилди. Унинг истеъфоси мамлакат бўйлаб намойишларга сабаб бўлган эди.
Фёдоровнинг айтишича, Украина Россиянинг кенг кўламли босқинига қарши уруш олиб бораётган бир пайтда ҳам сайловларни тиклаш йўлини топиши керак.
Истеъфосидан кейин Зеленский Фёдоровга ҳукуматда бир қатор юқори лавозимларни, жумладан, бош вазир ўринбосари лавозимини таклиф қилган. Аммо Фёдоров бу таклифларни рад этиб, фақат Мудофаа вазирлигини яна бошқарган тақдирдагина ҳукуматга қайтишини билдирган.
Қизиғи шундаки, Фёдоров аввалроқ уруш даврида сайлов ўтказишга чақирмаган эди. У бу фикрни Хмаранинг номзоди илгари сурилиб, Мудофаа вазирлигига қайтиш имкони қолмаганидан кейин билдирди.
Украина 2022 йилдан бери умуммиллий сайлов ўтказгани йўқ. Мамлакат Конституциясига кўра, ҳарбий ҳолат даврида сайлов ўтказиш мумкин эмас. Бундан ташқари, уруш шароитида умуммиллий овоз беришни ташкил этиш хавфсизлик ва логистика нуқтаи назаридан жуда мураккаб. Жумладан, фронтдаги ҳарбийлар, хорижда яшаётган миллионлаб украиналиклар ва фронтга яқин ҳудудлардаги аҳолининг сайловда иштирокини таъминлаш масаласи мавжуд.
Фёдоров зудлик билан сайлов ўтказишни талаб қилмаяпти ва аниқ муддат ҳам белгиламади. Аммо унинг фикрича, Украина уруш даврида ҳам сайлов ўтказиш механизмини ишлаб чиқиши керак. Бу орқали халқ амалдаги ҳокимият фаолиятига баҳо бериши ва уларга бўлган ишонч сақланиб қолган-қолмаганини билдириши мумкин.
Унинг таъкидлашича, демократияни уруш тугагунча «шунчаки кечиктириб қўйиш» мумкин эмас. Собиқ вазир сиёсий масъулият масаласини урушни олиб бориш билан ҳам боғлади. У коррупция ва бюрократик самарасизликни танқид қилди. Давлат маблағларини бошқаришдаги хатолар охир-оқибат инсонлар ҳаётига қимматга тушиши мумкинлигини айтди. Чунки мудофаа учун ажратилган маблағлар талон-торож қилинса ёки бошқа мақсадларга йўналтирилса, бу армия имкониятларига салбий таъсир қилади. Унинг таъкидлашича, ваколат, бюджет маблағлари ёки давлат лавозими ишониб топширилган амалдорлар эришилган натижалар учун жавоб бериши керак.
Фёдоров ҳокимиятни янада очиқ бўлишга чақирди. Унинг айтишича, уруш бошланганидан кейин ҳукуматга нисбатан билдирилган мисли кўрилмаган ишонч амалдорларга ўз қарорларини тушунтирмасдан ишлаш ҳуқуқини бермайди.
«Одамлар давлат ҳеч қачон хато қилмаслигини талаб қилмаяпти, — деди Фёдоров. — Аммо улар ҳақиқатни билишга ҳақли».
Фёдоровнинг бу чиқиши Зеленский Мудофаа вазирлиги атрофида бир ойдан бери давом этаётган инқирозга нуқта қўйишга ҳаракат қилаётган бир пайтда сайловлар масаласини яна кун тартибига олиб чиқди. Бироқ Фёдоровнинг украиналикларга тўғридан-тўғри мурожаат қилиб, сайловлар, жамият ишончи ва ҳокимиятнинг жавобгарлиги ҳақида гапириши унинг вазирликдан кетиши сиёсий фаолиятининг якуни эмас, балки янги сиёсий ролининг бошланиши бўлиши мумкинлиги ҳақидаги тахминларни кучайтирди.
<iframe width="650" height="420" src="https://www.youtube.com/embed/kgW68mAElGA" title="Sobiq mudofaa vaziri Ukrainada prezidentlik saylovini o‘tkazishga chaqirdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
