Бугун Марказий сайлов комиссиясининг мажлиси бўлиб ўтди. Унда Ўзбекистон Республикасининг референдумида овоз бериш бюллетенининг шакли ва тавсифи тасдиқланди.

— Референдумда овоз бериш бюллетенига “Ўзбекистон Республикасининг референдуми тўғрисида”ги Қонуннинг 29-моддасига асосан Ўзбекистон Республикаси Олий Мажлиси Қонунчилик палатасининг 2023 йил 10 мартдаги ҳамда Олий Мажлис Сенатининг 14 мартдаги қарорларида кўрсатилган масаланинг матни киритилди ва овоз берувчи хоҳиш-иродасининг вариантлари «ҳа» ёки «йўқ» деб кўрсатилди, — деди  Марказий сайлов комиссияси раиси ўринбосари Баҳром Қўчқоров. — Шунингдек, овоз бериш бюллетенида уни тўлдириш тартиби тўғрисида ҳам тушунтириш берилади. Овоз бериш бюллетенларини кўзи ожиз овоз берувчилар томонидан тўлдириш учун Брайль алифбоси асосида трафаретлар ҳам тайёрланади. Овоз бериш бюллетенлари референдум ўтказувчи округ комиссиялари томонидан тақдим этилган маълумотга мувофиқ референдум округи бўйича овоз берувчилар сонини, шу жумладан референдум округи ҳудудида истиқомат қилаётган кўпчилик аҳоли сўзлашадиган тилларда овоз бериш бюллетенларини тайёрлаш бўйича эҳтиёжни инобатга олган ҳолда чоп этилади.  

Йиғилишда комиссия томонидан овоз бериш бюллетенларини референдум ўтказувчи участка комиссияларига белгиланган муддатларда етказиб бериш чоралари белгиланди.  

Шунингдек, мажлисда Ўзбекистон Республикасининг референдумида хорижий давлатлар ва халқаро ташкилотлардан қатнашадиган кузатувчиларни ҳамда оммавий ахборот воситалари вакилларини аккредитациядан ўтказиш масаласи ҳам кўриб чиқилди.  

Қайд этилганидек, бугунги кунда кўплаб халқаро нашрларда референдумга тайёргарлик жараёнлари, МСКнинг йиғилишларига оид материаллар чоп этилмоқда. Бу мамлакатимизда кечаётган сиёсий жараёнларга катта қизиқиш билан қаралаётганидан далолат беради.  

Таъкидланганидек, МСК қарори билан Мустақил давлатлар ҳамдўстлиги Парламентлараро Ассамблеяси, Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бюроси, Грузия ва Озарбайжон давлатлари Марказий сайлов комиссияси ҳамда хорижий мамлакатлардан жами 26 нафар кузатувчи аккредитациядан ўтказилди. Шунингдек, Марказий сайлов комиссиясига келиб тушган мурожаатларга кўра, 14 та маҳаллий оммавий ахборот воситасининг жами 62 нафар вакили аккредитациядан ўтказилди. Эндиликда аккредитациядан ўтказилган маҳаллий оммавий ахборот воситалари вакилларининг умумий сони 346 нафарни ташкил этмоқда.  

Мажлисда, шунингдек, референдум ўтказувчи 6-Наманган, 8-Сирдарё,  

12-Хоразм округ комиссиялари раисларининг референдумга тайёргарлик кўриш ва уни юқори савияда ўтказиш борасида амалга оширилаётган ишлари хусусидаги ахборотлари тингланди.  

Мажлис сўнггида кун тартибидаги масалалар бўйича тегишли қарорлар қабул қилинди.  

Муҳтарама Комилова, Дониёр Ёқубов (сурат),ЎзА