Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга нисбатан ҳуқуқларни эътироф этиш ишларини янада тезлаштиришга қаратилган қонун лойиҳаси парламент қуйи палатаси мажлисида иккинчи ўқишда моддама-модда кўриб чиқилди.

Қонунчилик палатасининг Аграр ва сув хўжалиги масалалари қўмитаси раиси Равшан Мамутов қайд этганидек, мазкур лойиҳа билан “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги ҳамда “Кўчмас мулкка бўлган ҳуқуқларни давлат рўйхатидан ўтказиш тўғрисида”ги қонунларга ўзгартириш ва қўшимчалар киритиш таклиф этилмоқда.

Хусусан, ҳуқуқларни эътироф этиш билан боғлиқ бўлган ҳужжатларни кўриб чиқиш муддатларини қисқартириш, маълумотларни автоматлаштирилган ахборот тизимига киритиш тартибини ҳамда солиқ қарздорлиги тушунчасини аниқлаштириш, ер участкасига бўлган ижара ҳуқуқини эътироф этиш учун бир марталик тўловни бўлиб-бўлиб тўлашни амалга ошириш тартиби ва шартларини белгилаш ҳамда ҳуқуқларни эътироф этиш ишлари билан боғлиқ шикоятларни кўриб чиқиш механизмларини такомиллаштириш назарда тутилмоқда.  

Шунингдек, лойиҳада “солиқ қарздорлиги”га оид такрорланишларни бартараф этиш мақсадида асосий тушунчаларга алоҳида “ер солиғи бўйича, унда қурилган бинолар ва иншоотлар учун эса мол-мулк солиғи бўйича қарздорлик” тушунчаси киритилиб, унда солиқ қарздорлик – базавий ҳисоблаш миқдорининг ўттиз бараваридан ошадиган қисми этиб кўрсатилмоқда.

Шу билан бирга, қурилиши тақиқланган ҳудудга қисман тушган объектлар учун ҳам ечим берилмоқда. Яъни, бино ва иншоотлар қурилиши тақиқланган ҳудудда жойлашган бўлса, уни тўлиқ рад этмасдан тақиқланган ҳудудга тушган қисмни чегириб ташлаб, қолган қисмига нисбатан ҳуқуқларни эътироф этиш кўзда тутилмоқда.  

Бундан ташқари, ер участкаларида қурилган бинолар ва иншоотларнинг космик суратлари борасида охирги икки йилдаги сурати эътиборга олиниши белгиланмоқда.  

Таъкидланганидек, қонун лойиҳасида назарда тутилаётган нормалар жисмоний ва юридик шахсларнинг кўчмас мулк объектларига бўлган ҳуқуқлари эътироф этилишига тўсқинлик қилувчи омилларни бартараф этади. Инсон манфаатларини таъминлашга хизмат қилади.  

Муҳокамалардан сўнг қонун лойиҳаси қабул қилиниб, Сенатга юборилди.

Муҳтарама Комилова, ЎзА