Дюссельдорфда 20 миллион долларлик экспорт келишувлари имзоланди
Германиянинг Дюссельдорф шаҳрида бўлиб ўтган “Wire & Tube Düsseldorf 2026” халқаро саноат кўргазмаси Ўзбекистон электротехника саноати учун муҳим натижалар билан якунланди. Бу ҳақда “Ўзэлтехсаноат” уюшмаси ахборот хизмати хабар берди.
Ушбу йирик халқаро тадбирда “Ўзэлтехсаноат” уюшмаси ҳамда унинг тизимига кирувчи корхоналар фаол иштирок этиб, “Made in Uzbekistan” миллий стенди билан мамлакатнинг электротехника маҳсулотларини кенг намойиш этди. Кўргазма давомида маҳсулотлар сифати ва экспорт салоҳияти халқаро иштирокчилар томонидан юқори баҳоланди.
Тадбир доирасида Европа ва Америка компаниялари вакиллари билан қатор самарали B2B учрашувлар ўтказилди. Музокараларда кабель маҳсулотларини етказиб бериш, Германиянинг “Starofit” компанияси билан мис қувурлар ишлаб чиқаришни маҳаллийлаштириш, шунингдек, “CzechTrade” агентлиги орқали Европа Иттифоқи бозорларига чиқиш имкониятлари муҳокама қилинди.
Кўргазманинг энг муҳим натижаларидан бири сифатида бир қатор йирик экспорт келишувлари имзоланди. Жумладан, “Metsol” МЧЖ ва Словениянинг “Zikas” компанияси ўртасида ҳамда “Metal Processing Technology” МЧЖ ва немис ҳамкорлари ўртасида экспорт шартномалари расмийлаштирилди. Шу билан бирга, “Sharq Tubes” ва “Artikul Aziya Kabel” корхоналари Германия ва Австрия компаниялари билан ҳамкорлик тўғрисида келишувларга эришди.
Кўргазма якунига кўра, 2026 йил учун умумий қиймати 20 миллион АҚШ долларига тенг экспорт келишувлари имзоланди. Бу эса Ўзбекистон электротехника саноати корхоналарининг халқаро бозордаги мавқеини янада мустаҳкамлашга хизмат қилади.
Н.Зиёдуллаева, ЎзА
