Булутлар оғушидаги Термиз
ФОТОРЕПОРТАЖ
Термиз осмони бугун ўзига хос гўзаллик касб этди — гўё мовий осмон бағрига оқ булутлар орзудек чизилган. Енгил сузиб юрган булутлар гоҳ улкан тоғлар ёки муҳташам саройлар манзарасини эслатса, гоҳ осмоннинг чексиз қаърига сингиб кетгандек туюлади.
Қуёш нурлари булутлар орасидан сирғалиб ўтиб, ерга олтинсимон жилолар сочмоқда. Бу нафис манзара атрофга ўзгача латофат бағишлаб, инсон қалбига енгиллик ва хотиржамлик туйғусини олиб киради.
Айни дамда табиатда ҳукм сураётган мусаффолик ва сокинлик инсонни ўзига ром этади. Майин шамол дарахт баргларини енгил тебратиб, қушлар навоси билан уйғунлашар экан, Термиз табиатининг бетакрор гўзаллиги янада яққол намоён бўлади.
[gallery-28862]
Қуёшнинг илиқ нурлари остида яшилликка бурканган дарахтлар ва мусаффо ҳаво шаҳарга алоҳида файз бағишламоқда. Бу манзара инсонни табиатнинг беқиёс гўзаллиги ҳақида ўйлашга ундайди, қалбда эзгу ҳисларни уйғотади.
Термизнинг бугунги табиати нафақат кўзни қувонтиради, балки инсон руҳига ором бағишлайди. Ана шундай мусаффо ва сокин лаҳзалар табиатнинг беқиёс неъмат эканини яна бир бор ҳис эттиради.
Жонибек ҚЎЗИМУРОДОВ (сурат), ЎзА
