Пойтахт туманларини ривожлантириш тизимида янгича ёндашув қўлланилади
Тошкент шаҳри туманларини ривожлантиришда иқтисодий ва молиявий режалаштириш ҳамда натижадорликка асосланган бошқарув тамойилларига асосланган янги тизим жорий этилмоқда.
Мазкур янги ёндашув мақсадлар, ресурслар, муддатлар ва кутилаётган натижаларни аниқ белгилашни назарда тутади.
Бу ҳақда Тошкент шаҳар ҳокимлиги ахборот хизмати раҳбари Гулноза Қосимова қуйидагиларни маълум қилди.
– Мазкур тизимда ҳудудларни ривожлантириш “режа — бюджет — масъул — назорат — натижа” тамойили асосида ташкил этилади.
Сўнгги бир йил давомида Тошкентда халқаро тажрибани ўрганиш ҳамда Европа ва Осиё шаҳарларида қўлланиладиган замонавий бошқарув усулларини мослаштириш бўйича ишлар олиб борилди. Натижада пойтахтнинг 12 та туманининг ҳар бири учун халқ депутатлари Кенгашлари йиғилишларида тасдиқланадиган индивидуал ривожланиш режалари ишлаб чиқилди.
Янги тизим етарлича пухта ишлаб чиқилмаган лойиҳаларни амалга оширишдан воз кечишни кўзда тутади. Ҳар бир лойиҳа ривожланиш режаларига амалга ошириш муддатлари аниқ белгиланган, молиялаштириш манбалари ва бюджет параметрлари тасдиқланган, масъул ижрочилар бириктирилган бўлса ҳамда кутиладиган ва ўлчанадиган натижалар мавжуд бўлса амалга оширилади.
Бу молиявий ёки вақтинчалик асосга эга бўлмаган ташаббуслар амалиётига чек қўяди ва ресурслардан фойдаланишда янада тартибли ёндашувни таъминлайди.
Шу билан бирга, рақамли воситалардан фойдаланган ҳолда лойиҳалар ижросини доимий мониторинг қилиш тизими жорий этилмоқда. Бу бажарилиш жараёнини кузатиб бориш, оғишларни ўз вақтида аниқлаш ва жараёнларнинг доимий назорат режимида бошқарилишини таъминлаш имконини беради.
Ривожланиш режаларини шакллантиришда аҳолидан “Халқ назорати” платформаси, Халқ қабулхоналари, маҳалла органлари орқали келиб тушаётган мурожаат ва таклифлар, ОАВдаги сигналлар, журналист ва блогерларнинг мурожаатлари ҳамда ижтимоий тармоқлардаги муҳокамалар инобатга олинади. Бундай ёндашув қабул қилинаётган қарорларнинг ҳудудларнинг реал эҳтиёжлари билан уйғун бўлишини таъминлайди.
Маблағлар аҳоли турмуш сифатига бевосита таъсир кўрсатадиган устувор вазифаларни ҳал этишга, жумладан, ижтимоий инфратузилмани ривожлантириш, муҳандислик тармоқларини модернизация қилиш, йўлларни таъмирлаш, ҳудудларни ободонлаштириш ва шаҳар муҳити барқарорлигини оширишга йўналтирилади.
Янги тизимнинг жорий йилдан бошлаб босқичма-босқич жорий этилиши туманлар ривожланишини бошқаришнинг янада барқарор, шаффоф ва натижадор моделини шакллантиришга қаратилган.
Гулноза Бобоева,
ЎзА
