АҚШ Россия нефтига қўйилган санкцияларни вақтинча юмшатди
АҚШ Россия нефтини 11 апрелгача сотишга рухсат берди. Ёқилғи нархлари ошган бир пайтда қабул қилинган бу чорани АҚШ Молия вазирлиги “тор доирадаги” ва “қисқа муддатли” деб атади. Бу ҳақда DW хабар берди.
АҚШ Россия нефти ва нефть маҳсулотларини сотишни 11 апрелгача санкциялардан вақтинча чиқарди. Вақтинчалик санкциядан чиқариш фақат танкерларга юкланган нефть учун амал қилади. Бу операцияларни амалга оширишга рухсат берувчи лицензия 12 март куни АҚШ Молия вазирлиги сайтида эълон қилинди.
Вазирлик раҳбари Скотт Бессентнинг айтишича, президент Дональд Трамп бу қарорни “жаҳон энергетика бозори барқарорлигини таъминлаш ва нефть нархларини паст сақлаш” мақсадида қабул қилган.
Бессент ижтимоий тармоғидаги постида бу чора “жуда тор доирадаги ва қисқа муддатли” эканини айтди. Унинг таъкидлашича, бу қарор Россия ҳукуматига катта молиявий фойда келтирмайди.
Шунингдек, вазир нефть нархининг ошишини вақтинчалик деб изоҳлади. “Биз нархларни пасайтириш учун нефтга оид санкцияларни вақтинча бекор қиламиз. Айрим давлатларга нисбатан санкцияларни тўхтатамиз. Агар вазият тинч бўлса, балки кейинчалик уларни қайта тиклашга ҳожат ҳам қолмас”, — деди у.
Мутахассисларнинг фикрича, АҚШ Россияга ёрдам бериш учун эмас, балки нефть нархи кескин ошиб кетмаслиги ва жаҳон бозорида барқарорликни сақлаш учун санкцияларни вақтинча юмшатган. Шу ўринда нега АҚШга жаҳон бозори барқарорлиги керак, деган ўринли савол туғилади. Чунки, жаҳон бозорида нефть нархининг кескин ошиши АҚШ молия тизимига салбий таъсир қилади. Шунинг учун АҚШ биринчи навбатда ўз иқтисодиётини ҳимоя қилиш, энергетика нархларини назоратда ушлаш учун ҳам шундай чоралар кўрган бўлиши мумкин.
<iframe width="650" height="420" src="https://www.youtube.com/embed/_idqM5sCzPk" title="AQSh Rossiya neftiga qo`yilgan sanksiyalarni vaqtincha yumshatdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салим Обиджонов. ЎзА
