Абдусатторов Прага турнирида амалдаги жаҳон чемпионига қарши дона суради
Чехиянинг Прага шаҳрида “Prague International Chess Festival 2026” халқаро турнири “Masters” гуруҳида ўтадиган 4-тур баҳсида Нодирбек Абдусатторов қора доналарда испаниялик Давид Антон, Нодирбек Ёқуббоев эса оқ доналарда нидерландиялик Жорден ван Форест билан куч синашди.
Кеча ўтказилган мазкур 4-тур баҳсида гроссмейстерларимиздан Н.Абдусатторов қора доналарда испаниялик Дэвид Антон билан дуранг қайд этган бўлса, Н.Ёқуббоев ФИДЕ рейтингида ўзидан юқорида бораётган нидерландиялик ван Форестга муносиб қаршилик кўрсатди.
34-юришгача ҳужумкор вазиятда бўлган Ёқуббоев қўпол хатоликка йўл қўйиши туфайли устунлик палласи Европа вакили томонга оғиб кетди ва бу охир-оқибат ҳамюртимизнинг очко йўқотишига олиб келди-0:1.
Шу ўринда айтиш лозимки, айнан Нодирбек Ёқуббоевнинг имкониятни бой бериши Абдусатторовнинг гуруҳда етакчилик вазиятига салбий таъсир кўрсатди. Ғолибликка эришган ван Форест 3 очко билан якка пешқадамга айланиб олди.
Кейинги поғоналарда ҳаракатланаётган Нодирбек Абдусатторов, чехиялик Давид Навара ҳисобида 2,5 очко мавжуд бўлса, Ёқуббоев 2 очко билан улардан кейинги қаторни банд этган. Бугун, 1 март куни халқаро классик турнирнинг 5-тур мусобақасида Нодирбек Абдусатторов оқ доналарда жаҳон чемпиони Гукеш Доммараджу билан тўқнаш келади.
Нодирбек Ёқуббоев эса қора доналарда Давид Навара қаршилигини енгишга ҳаракат қилади.
Т.Рўзиев, ЎзА
