Жаҳонда юз бераётган нотинчлик, оммавий тартибсизликлар ва кескинликлар давлатлар тинчлигига путур етказиб, халқларнинг ўзаро дўстлиги ҳамда осойишталигига салбий таъсир кўрсатмоқда.

Айрим жиноий гуруҳлар эса қонунчиликдаги бўшлиқлардан фойдаланган ҳолда оммавий тартибсизликларни молиялаштириш ҳамда уларни ташкил этиш учун махсус тайёрланган шахсларни жалб этиш билан шуғулланиб келмоқда.

Сенатнинг ялпи мажлисида шу масалага алоҳида эътибор қаратилди. Сенаторлар муҳокама қилган “Ўзбекистон Республикаси Жиноят кодексининг 244-моддасига ўзгартириш киритиш тўғрисида”ги қонун юқоридаги каби ҳолатларнинг олдини олишга хизмат қилади.  

– Жиноят кодексининг 244 - моддасида оммавий тартибсизликлар ташкил қилганлик, уларда фаол қатнашганлик ва фуқароларга нисбатан зўравонлик қилишга омма олдида даъват қилганлик учун жиноий жавобгарлик белгиланган, – деди Сенат аъзоси Қутбиддин Бурҳонов. – Бироқ кодекс билан оммавий тартибсизликлар содир этиш мақсадида ўқувдан ўтганлик, жумладан, қурол-яроғ, портловчи, атрофдагилар учун хавф туғдирадиган бошқа буюмлар билан муомала қилишни ўрганганлик ҳамда оммавий тартибсизликларни ташкил қилиш фаолиятини молиялаштирганлик учун жавобгарлик назарда тутилмаган. Юртимизда тинчлик ва осойишталикни таъминлаш учун юқорида қайд этилган бўшлиқни тўлдириш ҳамда жиноят учун жавобгарликнинг муқаррарлигини таъминлаш мақсадида мазкур қонун ишлаб чиқилган.

Жумладан, Жиноят кодекси 244-моддасининг учинчи қисмида оммавий тартибсизликлар содир этиш мақсадида ўқувдан ўтганлик ҳамда худди шу модданинг тўртинчи қисмида ушбу ҳаракатларни молиялаштирганлик учун жиноий жавобгарлик белгиланмоқда.

Сенаторлар маъқуллаган қонун мамлакатимизда тинчлик ва осойишталикни таъминлаш, уюшган жиноятчиликка қарши самарали курашиш ҳамда жиноятларни профилактика қилиш тизимини такомиллаштиришга хизмат қилади.

Н.Абдураимова, Н.Ҳайдаров (сурат), ЎзА