Пойтахтимизда 18 ноябрь – Ўзбекистон Республикаси давлат байроғи қабул қилинган кунга бағишланган “Янги нафас” оммавий югуриш мусобақаси бошланди.

Мазкур оммавий югуриш мусобақаси Олий таълим, фан ва инновациялар вазирлиги, Соғлиқни сақлаш вазирлиги, "Асака банк" АТВ, Ички ишлар вазирлиги, Фавқулодда вазиятлар вазирлиги, Мактабгача ва мактаб таълими вазирлиги, Ёшлар сиёсати ва спорт вазирлиги, “Ўзбекнефтгаз” АЖ ва Ўзбекистон Енгил атлетика федерацияси томонидан ташкил этилди.    

Кўп тармоқли “Ҳумо Арена”  мажмуаси майдонида бошланган оммавий югуриш мусобақасида иштирокчилар 3 км ва 10 км масофага югурмоқдалар. Ушбу масофаларга югуриш бўйича ғолиблар 18 ёшдан 35 ёшгача, 35 ёшдан 55 ёшгача ва ундан катта ёшдаги эркаклар ва аёллар ўртасида ёш тоифалари бўйича аниқланади ҳамда оммавий югуриш мусобақасининг энг ёш ва энг кекса иштирокчилари ҳам алоҳида совғалар билан тақдирланади. Югурувчилар “Абсолют” ва “Ҳаваскор” тоифаларида совринлар учун кураш олиб боради.  

Эслатиб ўтамиз, “Янги нафас” оммавий югуриш мусобақаси республикамизнинг барча ҳудудларида бир вақтда, эрталаб соат 07:30 да бошланди. Пойтахтимиздаги мусобақада биринчи ўрин олганлар – 3 миллион,  иккинчи ўрин эса 2 миллион ва учинчи ўрин соҳиблари 1 миллион сўм пул мукофоти билан тақдирланади.    

 Тақдирлаш маросими 11:00 да “Пахтакор” спорт мажмуаси Енгил атлетика федерацияси стадиони ҳудудида бўлиб ўтади. Вилоятларда пул мукофоти ташкилий қўмиталар томонидан шакллантирилади.  

Жавоҳир Тошхўжаев,

ЎзА