Ўзбекистон Республикаси Президенти Шавкат Мирзиёев “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги фармонига асосан, Конституциямиз қабул қилинган кун олдидан бир гуруҳ маҳкумга нисбатан афв эълон қилинди.

Ўзбекистон Республикаси Президенти Шавкат Мирзиёев “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги фармонига асосан, Конституциямиз қабул қилинган кун олдидан бир гуруҳ маҳкумга нисбатан афв эълон қилинди.

Ота-боболаримиз хато қилганни ке­чиришни, йиқилганни суяшни, уни тўғри йўлга бошлашни доим насиҳат қилиб келган. Фармон авлоддан-авлодга ўтиб келаётган бу каби эзгу амалларимиз, асрий анъана ҳамда қадриятларимизни ифода этгани билан аҳамиятли. Қашқадарё вилоятидаги жазони ижро этиш муассасаларидан ҳам фармонга мувофиқ 10 нафар юртдошимиз жазони ижро этиш муассасаларидан озод қилиниб, оиласи бағрига қайтарилди.

Айтиш лозимки, афв эълон қилинишини нафақат озодликдан маҳрум этилган шахслар, балки уларнинг оила аъзолари, яқинлари ҳам интиқлик билан кутади. Айниқса, фарзандлари тақдиридан қайғураётган, бағри қон бўлган ота-оналар учун унинг баҳоси нақадар улуғлигини, изоҳлашга сўз ожиз.

Қарши шаҳрилик Фарруҳ Ярашев ҳам тақдир сўқмоқларини нотўғри тарафида юриб йўлидан адашди. Билиб-билмай жиноят кўчасига кириб қолди. Оқибатда умрининг гуллаган дамларини панжара ортида ўтказишга мажбур бўлди. Ўтган давр унга сабоқ бўлди. Хато қилганини англаб етди. Тузалиш йўлидан борди. Қайтиб жиноят йўлига кирмасликка ваъда бериб, Президентимиздан афв сўради. Чин кўнгилдан сўралган узр қабул қилиниб, озодликка чиқарилди.

- Бу кўргиликларни ҳеч бир онанинг бошига солмасин, – дейди кўзида ёш билан Фарруҳ Ярашевнинг онаси Гулсара Шамсиева. – Ўғлим билиб-билмай хато қилиб қўйди. Бузғунчилар домига тушиб қолди. Улар боламнинг соддалигидан, очиқ кўнгиллигидан фойдаланишди. У озодликдан маҳрум этилганда фарзанди 52 кунлик чақалоқ эди. Орадан 6 йил ўтди. Ўтган ҳар бир кун мен учун минг азобда ўтди. Давлатимиз фарзандимни кечириб, қоронғи кунларимга нур бахшида этди. Энди ҳеч қачон эгри йўлларга кирмайди. Ҳалол меҳнат қилиб, давлатимиз ривожига ўз ҳиссасини қўшади. Оиласига бош бўлади.

Жигарбандининг севинчига шерик бўлганларнинг қалбларида мамлакатимизда амалга оширилаётган ислоҳотларга нисбатан шукроналик, кўзларида эса қувонч ёшлари қалқиб турибди. Мурувват ғамхўрлик, инсонпарварлик каби олий фазилатларнинг нозик қирраларини ўзида мужассамлаштирган мазкур фармонга асосан муддатидан 5 йил олдин жазодан озод бўлган яна бир юртдошимиз Баҳром Қурбонов ҳам озодликка чиққанининг илк сониялариданоқ онаси қабрини зиёрат қилишни ихтиёр этди. Онаизорининг сўнгги ўтинчини эшитиш унга армон бўлиб қолган эди. Афсус сўнгги пушаймон, ўзингга душман.