FOTOREPORTAJ

So‘ngi yillarda aholi, tadbirkorlik korxonalari va ijtimoiy soha ob’ektlarini barqaror elektr energiyasi bilan ta’minlash uchun sohaga yangilanishlar keng tadbiq qilinmoqda. Buning natijasida joylardagi muammolar bosqichma-bosqich o‘zining ijobiy yechimini topmoqda. Bu borada “Buxoro hududiy elektr tarmoqlari korxonasi” AJ tomonidan viloyat iste’molchilarini uzluksiz va sifatli elektr energiyasi bilan ta’minlash maqsadida qator chora-tadbirlar amalga oshirilayotir.  

[gallery-22599]

Viloyat hududlarida podstansiyalarning quvvatlari oshirilib, yangi kuch transformatorlari o‘rnatilmoqda. Jumladan, Buxoro shahrida ko‘plab sanoat korxonalari va aholini elektr energiyasi bilan ta’minlovchi “Strelkov” 110/10 kV podstansiyasida 2 dona quvvati 63 ming kVA bo‘lgan kuch transformatorlari o‘rnatildi. Ilgari ushbu podstansiyaning umumiy quvvati 45 ming kVAni tashkil qilgan bo‘lsa, endilikda 126 ming kVAga yetdi. Shuningdek, Peshku tumanidagi “Afshona” 110/35/10 kV podstansiyasidagi 10 ming kVAli transformator o‘rniga 25 ming kVAli, Buxoro shahridagi “Mohixossa” 35/10 kV podstansiyasidagi 2 dona 6 ming 300 kVAli transformatorlar o‘rniga 2 dona  10 ming kVA quvvatdagi kuch transformatorlari o‘rnatilib, ishga tushirildi.  

Amalga oshirilayotgan ishlar iste’molchilarni yanada sifatli, me’yor darajasidagi elektr energiyasi bilan ta’minlashda hamda tarmoqlardagi yo‘qotishlarni sezilarli darajada kamaytirishda o‘z samaradorligini ko‘rsatadi.

O‘zA fotomuxbiri

Tohir ISTATOV olgan suratlar