Xorijiy fuqarolar huquqlari ham davlat himoyasida

Bugun Yangi O‘zbekistonning xalqaro maydondagi nufuzi nafaqat iqtisodiy islohotlar, balki inson huquq va erkinliklarini ta’minlash borasidagi qat’iy qadamlari bilan ham yuksalib bormoqda. Mamlakatimizda istiqomat qilayotgan har bir shaxs, uning millati, dini va fuqaroligidan qat’i nazar, qonun himoyasidadir. Ayniqsa, inson hayotidagi muhim voqealarni huquqiy jihatdan mustahkamlash, davlat xizmatlarini ko‘rsatishda tenglik va ochiqlik tamoyillariga tayanish adliya organlari faoliyatining bosh mezoniga aylandi. Bu jarayonda bola huquqlarini himoya qilish, ularning tug‘ilishini o‘z vaqtida qayd etish va huquqiy maqomini belgilash kelajak avlod oldidagi mas’uliyatimizning amaliy ifodasidir.

Toshkent shahrining zamonaviy qiyofasi va mehmondo‘st muhiti bugun ko‘plab xorijiy fuqarolarning yurtimizda yashab, faoliyat yuritishi uchun qulay imkoniyat yaratmoqda. Buning bir misoli sifatida poytaxtimizda istiqomat qilayotgan Germaniya Federativ Respublikasi fuqarolari Rigerlar oilasini keltirish mumkin. Yaqinda mazkur oilada dunyoga kelgan Aleksandra Yelizabet Rigerning tug‘ilganlik holati Chilonzor tumanidagi 2-son FHDYO bo‘limi tomonidan qonunchilikda belgilangan tartibda davlat ro‘yxatidan o‘tkazildi.

Chaqaloqning otasi Paul Simon Riger va onasi Karina Riger bo‘limga murojaat qilib, zarur hujjatlarni taqdim etishdi. FHDYO organi tomonidan qisqa fursatda tegishli dalolatnoma yozuvi rasmiylashtirilib, ota-onaga bolaning tug‘ilganligi haqidagi guvohnoma topshirildi. Bu nafaqat oilaviy quvonch, balki bolaning huquqiy jihatdan davlat tomonidan e’tirof etilishi va kelajakda barcha ijtimoiy imtiyozlardan foydalanishi uchun huquqiy asosdir.

Mutaxassis sifatida ta’kidlashim joizki, tug‘ilganlikni o‘z vaqtida qayd etish — bu shunchaki qog‘ozbozlik emas, balki shaxsning jamiyatdagi huquqiy mavjudligini tasdiqlovchi eng muhim hujjatdir. Bizning bo‘limimiz tomonidan xorijiy fuqarolarga xizmat ko‘rsatishda xalqaro huquq normalari va milliy qonunchiligimizning insonparvarlik tamoyillariga qat’iy amal qilinmoqda. Bu esa O‘zbekistonning bag‘rikeng va huquqiy demokratik davlat sifatidagi qiyofasini yanada mustahkamlaydi.

Xulosa o‘rnida aytish mumkinki, inson qadrini ulug‘lash, uning huquq va manfaatlarini har qanday vaziyatda himoya qilish Yangi O‘zbekiston taraqqiyot strategiyasining asosiy ustunidir. Xorijiy fuqarolar oilasida tug‘ilgan chaqaloqning hujjatlarini rasmiylashtirish jarayoni yurtimizda qonun oldida barchaning tengligi va inson huquqlari oliy qadriyat ekanini yana bir bor isbotlaydi. Zero, har bir bola, qayerda va qaysi millat oilasida tug‘ilishidan qat’i nazar, e’tibor va huquqiy himoyaga loyiqdir. Biz kabi soha xodimlarining asosiy vazifasi esa bu huquqlarning amalda, sifatli va shaffof tarzda ta’minlanishiga xizmat qilishdan iboratdir.

Dilnoza Radjabova,  

Chilonzor tumani 2-son FHDYO bo‘limi 1-toifali inspektori