Венгрия делегацияси ОКМКда бўлди
Бугунги кунда Олмалиқ кон-металлургия комбинати ўзининг улкан ишлаб чиқариш салоҳияти ва стратегик хом ашё захиралари билан хорижий инвесторлар учун юқори ишончли ва манфаатли ҳамкор сифатида кўрилмоқда. Хусусан, ОКМКга ташриф буюрган Венгриянинг Ўзбекистон Республикасидаги Фавқулодда ва мухтор элчиси Ёжеф Рожа бошчилигидаги делегация аъзолари ҳам комбинат билан манфаатли ҳамкорлик алоқаларини йўлга қўйиш истагини билдирди.
Делегация аъзолари ва Олмалиқ кон-металлургия комбинати раҳбарияти билан ўтказилган учрашув давомида Венгрия компаниялари билан комбинат ўртасида қўшма лойиҳаларни амалга ошириш масалалари муҳокама этилди. Хусусан, Венгриянинг “EU-Roller” компанияси билан конвеер роликларини ишлаб чиқариш бўйича масалалар кўриб чиқилди.
Меҳмонлар “Ёшлик 1” кони ҳудудида жойлашган Майдалаш ва қайта юклаш мажмуасида ҳам бўлиб, у ердан 3-Мис бойитиш фабрикасининг йирик майдаланган руда омборига етказиб берилаётган маъданларни ташиш жараёнини кузатди.
Маълумот учун, Германиянинг “Aumund” компанияси томонидан ишлаб чиқарилган 6 та пластинали таъминлагичлар ёрдамида тасмали конвеерлар орқали узунлиги 4 минг 200 метрни ташкил этувчи “FLSmidh” компаниясида ишлаб чиқарилган 2 та магистрал конвеерлар орқали маъдан ташилади.
Ўз навбатида, ҳар бири 1 500 кВт қувватга эга бўлган 4 та конвеер ABB компаниясининг электродвигателлари билан жиҳозланган. Ушбу конвейерлар соатига 6 500 тонна маъданни секундига 4 метр тезликда “Ёшлик-1” конидан 3-Мис бойитиш фабрикаси ҳудудида жойлашган, умумий сиғими 320 минг тонна бўлган йирик майдаланган руда омборига етказиб беради.
– Бундан 2 йил аввал ОКМКга илк бора келгандим. Ўтган 2 йил давомида комбинатда кўплаб ўзгаришлар бўлибди, – дейди Венгриянинг Ўзбекистондаги Фавқулодда ва мухтор элчиси Ёжеф Рожа. – Давлатингиз раҳбари бошчилигида жорий йилнинг март ойида расман ўз фаолиятини бошлаган 3-Мис бойитиш фабрикаси бизни ҳайратлантирди. Таъкидлаш керакки, фабрика энг замонавий технологиялар билан жиҳозланган экан. Бугун мен билан бирга Венгриянинг айнан тоғ-кон саноати соҳасида энг етакчилардан бўлган компания вакиллари ҳам келди. Ўйлайманки, келгусида қўшма лойиҳаларни ишлаб чиқиб, ҳамкорлик муносабатларини янги босқичга олиб чиқамиз.
Шунингдек, меҳмонлар ташриф давомида 3-Мис бойитиш фабрикаси фаолияти билан ҳам яқиндан танишди.
А.Мусаев, ЎзА
